اتحاد کو لے کر کانگریس ۔جے ڈیا ایس میں کوئی اختلاف نہیں: کمار سوامی
نئی دہلی،21؍مئی ( ایس او نیوز؍آئی این ایس انڈیا ) اتحاد کو لے کر کانگریس کے ساتھ وقوع پذیر ہونے والے اختلافات کی خبروں کوکمار سوامی نے فرضی اور غلط قرار دیا ہے۔ کمار سوامی نے نیوز ایجنسی کے صحافی سے پلٹ کر سوال کیاکہ آپ سے کس نے کہا؟ یہ غلط اور فرضی خبر ہیں ،یہ درست نہیں ہے۔ واضح رہے کہ 19 مئی کو فلور ٹیسٹ سے پہلے ہی کرناٹک کی بی ایس یدی یورپا سرکار گر گئی تھی، اور جے ڈی ایس۔ کانگریس اتحاد کو حکومت بنانے کی دعوت ملی اور اب کمار سوامی کی قیادت میں 23 مئی کو ریاست میں نئی حکومت کی تشکیل ہونی ہے۔ اس سے پہلے ایک خبر یہ بھی آئی کہ کرناٹک میں شاید ایک نہیں، دو نائب وزیر اعلی بنائے جا سکتے ہیں۔ ریاستی کانگریس صدر کی طرف سے یہ بات کہی گئی تھی۔ اس کے بارے میں حتمی فیصلہ کانگریس کی مرکزی قیادت کرے گی۔ مخلوط حکومت کے وزیر اعلی کمار سوامی پیر کو کانگریس کے سرکردہ لیڈروں سے دہلی میں ملاقات کریں گے۔ اختلافات کی خبروں کی تردید کرتے ہوئے کانگریس لیڈر نے کہا کہ ہم لوگ 100 فیصد خوش ہیں۔ یہاں لینے اور دینے کی پالیسی ہے۔ یہاں تک کہ بنگلور میونسپل کاپوریشن میں گزشتہ تین سال سے اتحاد ہی کام کر رہا ہے۔ اس سے پہلے کانگریس لیڈر ڈی شیو کمار نے ایک سوال کے جواب میں کہا کہ یہ اتحاد کی حکومت پورے پانچ سال چلے گی یا نہیں، اس کا جواب وقت دے گا۔ میں اب اس کا جواب نہیں دے سکتا۔ انہوں نے کہا کہ کرناٹک میں سیکولر حکومت بنے، اس کا فیصلہ کانگریس صدر راہل گاندھی نے کیاہے ۔ اس دوران آل انڈیا ویرشیو مہاسبھا نے کمار سوامی کو خط لکھ کر کانگریس لیڈر شمنوروکو وزیر داخلہ بنائے جانے کا مطالبہ کیا۔ ساتھ ہی جنرل اسمبلی نے کمیونٹی کے پانچ دیگر رہنماؤں کو کابینہ میں وزیر بنائے جانے کا بھی مطالبہ کیا ہے۔ لنگایت طبقہ کی جانب سے بھی یہ مطالبہ کیا جا رہا ہے کہ ریاست میں کسی لنگایت کو نائب وزیر اعلی کا عہدہ دیا جائے ۔