بنگلورو،18؍جولائی(ایس او نیوز)ریاست میں قومی شاہراہوں کو ترقی دینے کے سلسلے میں آج وزیر اعلیٰ ایچ ڈی کمار سوامی نے آج دہلی میں مرکزی وزیر برائے بری نقل وحمل نتن گڈکری سے بات چیت کی۔

اس موقع پر وزیر برائے تعمیرات عامہ ایچ ڈی ریونا بھی وزیر اعلیٰ کے ساتھ رہے۔ ریاست میں مختلف شاہراہوں کی تکمیل میں رکاوٹوں کے سلسلے میں وزیر کومتوجہ کرایا گیا اور مرکزی وریاستی حکومتوں کے درمیان تال میل سے کاموں کو مکمل کرنے پر زور دیا گیا۔ محکمۂ مالگزاری ، توانائی ، جنگلات اور دیگر محکموں کے اڈیشنل چیف سکریٹریوں اور چیف سکریٹریوں کے ساتھ ایک میٹنگ کرکے وزیر اعلیٰ نے قومی شاہراہوں کے کاموں کو تیزی سے مکمل کرنے کا اعلان کیا ہے، اس کے علاوہ مرکزی حکومت کی ہدایت کے مطابق جنگلاتی علاقوں میں قومی شاہراہوں کی توسیع کے لئے درختوں کی کٹائی کو کم از کم کئے جانے اور ضوابط کے مطابق زمین فراہم کرنے پر بھی اتفاق کیاگیا ۔  جہاں اسپیشل لینڈ ایکویزیشن افسروں کا تقرر نہیں ہوا ہے فوری طور پر ان کا تقرر کرنے پر زور دیا گیا۔ چن رائے پٹن ، ہولے نرسی پور، ارکل گوڈ ، کوڈلی پیٹ سے مرکیرہ تک قومی شاہراہ کو بہتر بنانے پر اتفاق کیا گیا۔ اس کے ساتھ ہی مسٹر نتن گڈکری نے اس منصوبے کے لئے جلد بلو پرنٹ تیار کرنے کی ہدایت دی ہے۔ کرناٹک اور کیرلا کے درمیان قومی شاہراہ نمبر 212 پر مطلوبہ فلائی اوور کی تعمیر کے لئے مسٹر نتن گڈکری نے کہاکہ حکومت کیرلا کی منظوری کے فوری بعد ان فلائی اووروں کی تعمیر کا کام آگے بڑھایا جاسکتا ہے۔