بھٹکل میں انجمن ڈگری کالج کے زیر اہتمام کرناٹکا یونیورسٹی فٹ بال ٹورنامنٹ کا شاندار افتتاح؛ بھٹکل انجمن کی دونوں ٹیمیں کوارٹر فائنل میں داخل
بھٹکل:15/فروری (ایس او نیوز)انجمن ڈگری کالج اینڈ پی جی سنٹر بھٹکل اور کرناٹکا یونیورسٹی دھارواڑ کے اشترا ک سے انجمن کالج گراؤنڈ میں کرناٹکا یونیورسٹی کے سنگل زون بین کالج فٹ بال ٹورنامنٹ کا15فروری بروز جمعرات کی صبح بھٹکل اسسٹنٹ کمشنر منجوناتھ کے ہاتھوں شاندار افتتاح ہوا۔
اسسٹنٹ کمشنر منجوناتھ نے اس موقع پر کھلاڑی طلبا سے مخاطب ہوکر کہاکہ جیت اور ہار ہر میچ کا حصہ ہوتے ہیں، ہار سے کسی کوحوصلہ ہارنے کی ضرورت نہیں ہے اور نہ ہی جیت سے کسی کو اترانے کی ضرورت ہے ، بلکہ ہاراور جیت کو یکساں طور پرقبول کرتے ہوئے اپنی صلاحیتوں اور قابلیتوں کے جوہر دکھلانے کی ضرورت ہے۔ نہرو ڈگری کالج ہبلی کے فزیکل ڈائرکٹر ڈاکٹر ارشاد احمد مکوبھائی نے انجمن ڈگری کالج کے زیر اہتمام دوسری مرتبہ فٹ بال ٹورنامنٹ کا منظم انداز میں انعقاد کرتے ہوئے انتظامی امور میں کالج کے مکمل ہونے کا ثبوت دینے پر ستائش کی۔ انجمن حامئی مسلمین بھٹکل کے صدر عبدالرحیم جوکاکو نے پروگرام کی صدارت کی۔ اس موقع پر انجمن ڈگری کالج کے سکریٹری جاوید حسین آرمار، پرنسپال پروفیسر مشتاق احمد شیخ، نائب پرنسپال سہیل احمد مجاور، انتظامی سکریٹری پروفیسر ایم ایم ملک وغیرہ موجود تھے۔
بی کام کے متعلم حسن قاضیا کی تلاوت قرآن سے پروگرام کا آغاز ہوا۔ پروفیسر غانم محتشم نے ٹورنامنٹ میں شریک ٹیموں کا تعارف پیش کیا۔بی ایس سی کے متعلم ایم ایچ مازین نے استقبال کیا۔ بی کام کے متعلم لئیق احمد اور محمد تمجید نے مہمانوں کا تعارف پیش کیا۔ بی کام کے فارس نیلاور نے شکریہ اداکیا۔ بی کام کے عبدالمہیمن سعدا اور محمد شاہ بندری نے بہترین انداز میں نظامت کے فرائض انجام دئیے۔ ٹورنامنٹ میں کرناٹکا یونیورسٹی سے ملحق کل 14فٹ بال کی ٹیمیں شریک ہوئی ہیں۔
آج پورے دن جملہ سات میچس کھیلے گئے جس کی تفصیلات اس طرح ہیں:
گلوبل کالج ہبلی ۔۔۔ بمقابلہ۔۔ کرناٹکا سائنس کالج دھارواڑ۔۔۔۔ گلوبل کالج نے میچ 4 - 0 سے جیت لیا
IBMR کالج ہبلی ۔۔۔ بمقابلہ ۔۔۔ جین کالج ہبلی۔۔۔۔ IBMR نے یہ میچ 3 - 0 سے جیت لیا
نہرو کالج ہبلی ۔۔۔ بمقابلہ ۔۔۔۔۔کرناٹکا آرٹس کالج ۔۔۔ نہر و کالج نے میچ 2 - 0 سے جیت لیا
پریورتن کالج ہبلی ۔۔بمقابلہ ۔۔۔ DSS-SMI یو جی۔ پی جی دھارواڑ۔۔۔۔ پریورتن کالج نے میچ 1 - 0 سے جیت لیا
انجمن آرٹس سائنس اینڈ کامرس کالج اینڈ پی جی سینٹر بھٹکل ۔۔۔ بمقابلہ ۔۔۔KSS بناشنکری کالج دھارواڑ۔۔ بھٹکل کالج نے 2 - 1 سے جیت لیا
انجمن انسٹی ٹیوٹ بی بی اے بھٹکل ۔۔۔ بمقابلہ۔۔۔۔ پی سی جبین کالج ہبلی ۔۔۔۔ انجمن بھٹکل نے 2 - 0 سے جیت لیا
گلوبل کالج ہبلی ۔۔۔ بمقابلہ۔۔۔۔ شیواجی کالج باڈ، کاروار۔۔۔ ٹائی بریک میں گلوبل کالج ہبلی نے 4 - 2 سے جیت لیا
کل ٹورنامنٹ کے دوسرے اور آخری دن تین کوارٹرفائنلس، دو سیمی فائنلس، تیسرے مقام کے لئے ایک میچ اور فائنل میچ اس طرح جملہ سات میچس کھیلے جائیں گے۔
بتایا گیا ہے کہ صبح 6:55 ٹیموں کی رپورٹنگ ٹائمنگ ہے، 7 بجے سے میچس شروع ہوں گے۔