بنگلورو،16اپریل (ایس او نیوز) ریاست میں بہت سارے مسافر جو روزانہ کرناٹکا اسٹیٹ روڈ ٹرانسپورٹ کارپوریشن( کے ایس آرٹی سی ) بسوں میں سفر کرتے ہیں ، انہیں رعایت دی گئی ہے ۔بعض لوگ حکومت کی جانب سے مفت سفر کرتے ہیں جبکہ بعض مسافروں کو رعایت دی گئی ہے۔ اس کیلئے کے ایس آر ٹی سی کی جانب سے بس پاس جاری کی گئی ہیں۔ چونکہ معاملہ اب ڈیجیٹل نظام کا چل رہا ہے ۔ اس لئے کے ایس آر ٹی سی بس انتظامیہ بھی اس سلسلہ میں غور وفکر کررہے ہیں کہ بس پاس کیلئے اب اسمارٹ کارڈ جاری کئے جائیں ۔ اس کیلئے ضروری ہے کہ جن مسافروں کو پہلے سے ہی بس پاس جاری کئے گئے ہیں ان سے واپس لئے جائیں تاکہ انہیں اسمارٹ کارڈ فراہم کرنے میں آسانی ہو ۔ ذرائع سے موصولہ اطلاع کے مطابق اسٹیٹ ٹرانسپورٹ کارپوریشن کی جانب سے تقریباً 5.6لاکھ طلباء وطالبات کو بس پاس جاری کئے گئے ہیں ۔ جبکہ 10ہزار بس پاس ان لوگوں کو جاری کئے گئے ہیں جو جسمانی طور پر معذور ہیں ۔ گزشتہ بجٹ میں حکومت نے اعلان کیا ہے کہ ان تمام بس پاس ہولڈرس کو اسمارٹ کارڈ جاری کئے جائیں گے۔کے ایس آر ٹی سی بس انتظامہ نے اس کیلئے متعدد کمپنیوں کو مدعو کیا ہے تاکہ نئی ٹکنالوجی کی مدد سے اسمارٹ کارڈ کو بہتر طور پر پیش کئے جاسکیں۔ چونکہ محکمہ کو اس بات کا خدشہ تھا کہ اسمارٹ کارڈ کی نقل کی جاسکتی ہے اس لئے اس کیلئے بہت محنت کی گئی ہے اور بڑی بڑی کمپنیوں نے اس سلسلہ میں ڈیمو بھی پیش کیا ہے جسے دیکھنے کے بعداس پر غور وخوض کیا جارہا ہے ۔ ایک سینئر افسر نے بتایا کہ نئی ٹکنالوجی کی مدد سے اس طرح کے اقدامات بھی کئے گئے ہیں کہ اسمارکاڈ کی نقل ممکن نہیں ہے ۔ انہوں نے مزید بتایا کہ اس سلسلے میں کوششیں کی جارہی ہیں کہ بس میں سفرکرنے والے بس پاس ہولڈرس کو سہولیات فراہم کئے جائیں تاکہ نہ صرف محکمہ کوفائدہ ہوبلکہ ملازمین اورمسافرین کو بھی آسانی ہو ۔اس کیلئے 12ہزار الیکٹرانک ٹکٹنگ مشین (ای ٹی ایم ) کو بھی تیار کرنے کی ضرورت ہے ، چونکہ ماہانہ بس پاس کی جانچ کیلئے بھی اس سے متعلق سافٹ ویر چاہئے اس لئے بس میں موجود ہر کنڈکٹر کوای ٹی ایم فراہم کی جائے گی۔