بنگلورو،10؍ جولائی(ایس اونیوز) ریاستی لیجسلیٹیو کونسل کے اپوزیشن لیڈر ایشورپا نے ساحلی علاقوں میں بدامنی کیلئے وزیراعلیٰ سدرامیا کو ذمہ دار ٹھہراتے ہوئے ان کے استعفیٰ کا مطالبہ کیا ہے۔اخباری نمائندوں سے بات چیت کرتے ہوئے انہوں نے کہاکہ وزیراعلیٰ سدرامیا کو یہ یقین ہوچکا ہے کہ فرقہ وارانہ فسادات برپا کئے گئے تو کانگریس اقتدار پر آئے گی۔ اسی لئے ساحلی علاقوں میں فرقہ وارانہ تشدد کو ہوادی جارہی ہے اور بی جے پی کے ہمنوا بننے والے مسلمانوں کوڈرا دھمکاکر کانگریس کی طرف راغب کیا جارہاہے۔انہوں نے کہاکہ وزیر اعلیٰ سدرامیا میں یہ جرات نہیں ہے کہ فرقہ وارانہ فسادات کیلئے ذمہ دار عناصر کے خلاف کارروائی کا اعلان کرسکیں۔ ایک مخصوص مذہب سے وابستہ لوگوں سے انہیں گہری ہمدردی ہے، اسی لئے وہ قاتلوں کو فری چھوٹ دے رکھے ہیں ، پہلے ہی حکومت مستعد ہوکر کارروائی کرتی تو ایسی صورتحال پیدا نہ ہوتی۔ انہوں نے کہاکہ اس سے پہلے 1991میں جب رام نگرم میں فرقہ وارانہ فسادات ہوئے تو اس وقت کے وزیراعلیٰ ویریندرا پاٹل کو اقتدار سے ہاتھ دھونا پڑا۔اس بار سدرامیا کو بھی اسی طرح اقتدار کھونا پڑے گا۔ اڈپی کے پیجاور مٹھ میں دعوت افطار کے اہتمام کو لے کر پیدا ہونے والے تنازعہ کو غیر ضروری قرار دیتے ہوئے ایشورپا نے کہاکہ اس مٹھ کے سربراہ نے سماج میں امن وامان کیلئے یہ پہل کی ہے، اس پر نکتہ چینی نہیں کی جانی چاہئے۔