بنگلورو،25؍ جون (ایس او  نیوز) روزگار ضمانت اسکیم کے تحت نریگامزدوروں کو مرکزی حکومت سے 1050 کروڑ روپئے ادا ہونے باقی ہیں ۔ جلد از جلد رقم جاری کرنے کیلئے مرکز سے مطالبہ کیا گیا ہے ۔ ریاستی وزیر دیہی ترقیات و پنچایت راج کرشنا بائرے گوڈا نے یہ بات بتائی ۔ اپنے عہدے کاجائزہ لینے کے بعد گزشتہ روز پہلی مرتبہ ضلع پنچایت کے ایگزی کیٹیو اور پنچایت افسروں کے ساتھ منعقدہ میٹنگ کے بعد میڈیا سے بات چیت کرتے ہوئے انہوں نے بتایا کہ گزشتہ سال نریگا منصوبہ میں ریاستی حکومت نے مزدوروں کو 1,500 کروڑ روپئے جاری کیا ہے جبکہ مرکزی حکومت نے صرف 450 کروڑ روپئے جاری کئے ہیں مزید 1,050 کروڑ روپیوں کی ادائیگی باقی ہے ۔ اس لئے جلد از جلد فنڈ جاری کرنے مرکزی حکومت سے اپیل کی گئی ہے اس سلسلہ میں مرکزی وزیر سے بھی ملاقات کی جائے گی ۔ انہوں نے بتایا کہ امسال مانسون کے ابتداء ہی میں اچھی بارش ہوئی ہے ۔ جس کی وجہ سے روزگار ضمانت اسکیم میں مزدوروں کی مانگ بھی کم ہوگئی ہے اس کے باوجود مویشیوں کی کوٹھیوں کی تعمیر، درخت اُگانے کے منصوبے تیار کرکے 3500 کروڑ روپیوں کے اخراجات سے بے روزگاروں کو روزگار کے مواقع فراہم کئے جائیں گے ۔انہوں نے بتایا کہ ریاست میں پینے کے پانی کی قلت دور کرنے کی غرض سے ریاستی حکومت نے 17 ہزار شفاف پینے کے پانی کے یونٹس قائم کرنے کا فیصلہ کیا گیا ہے ۔ اب تک 12 ہزار یونٹس قائم کئے جاچکے ہیں ۔ بقیہ یونٹس کے قیام کیلئے تیاریاں تیزی سے چل رہی ہیں۔ حال ہی میں قائم کئے گئے 11 ہزار پینے کے پانی کے یونٹس کے کام نہ کرنے سے متعلق شکایات موصول ہوئی ہیں ایسے معاملات کا پتہ لگاکر 15 جولائی سے قبل تمام یونٹس کی مرمت کرنے کیلئے متعلقہ ذمہ داروں کو ہدایت دی جائے گی ۔ پینے کے پانی کا مسئلہ حل کرنے کیلئے سالانہ ایکشن پلان تیار کرنے کا فیصلہ کیا گیا ہے ۔ یکم جولائی سے قبل ضلعی سطح پر ایکشن پلان تیار کرکے رپورٹ پیش کرنے ڈپٹی کمشنروں کو ہدایت دی گئی ہے ۔ بارش سے تباہ ہوجانے والی سڑکوں کی فوری مرمت کرنے کیلئے ڈسٹرکٹ افسروں کو سخت ہدایت دے دی گئی ہے ۔ مرکزی حکومت پر برہمی کا اظہار کرتے ہوئے وزیر موصوف نے کہا کہ وزیر اعظم گرام سڑک یوجنا کے تحت ریاست کو توقع کے مطابق گرانٹ نہیں مل رہا ہے ۔ ’ہمارا دیہات، ہماری سڑک ‘ منصوبہ کے ذریعہ ریاستی حکومت نے خود مکمل خرچ برداشت کرتے ہوئے دیہاتوں کی سڑکوں کی ترقی کی ہے ۔ مرکزی حکومت نے تیسرے مرحلے کے وزیر اعظم گرام سڑک یوجنا جاری کرنے کا فیصلہ کیا ہے ۔ اس منصوبے کیلئے ریاستی حکومت بھی ماسٹر پلان تیارکررہی ہے ۔اس منصوبے کے تحت مرکز سے امسال تقریباً 400 تا 500 کروڑ روپئے ریاست کو جاری کئے جانے کی توقع ہے ۔