کابینہ میں توسیع کے ساتھ وزارت میں ردوبدل بھی ممکن، پانچ تا چھ وزراء کو ہٹانے پر غور: دنیش گنڈو راؤ
بنگلورو،19؍دسمبر(ایس او نیوز)کرناٹکا پردیش کانگریس کمیٹی صدر دنیش گنڈو راؤ نے آج اشارہ دیا کہ ریاستی کابینہ کی 22 دسمبر کو توسیع کے مرحلے میں وزارت میں بڑے پیمانے پر ردوبدل بھی ہوسکتی ہے اور ردوبدل کے مرحلے میں پانچ چھ وزراء کو ہٹایا بھی جاسکتا ہے۔
سورنا ودھان سودھا میں اخباری نمائندوں سے بات چیت کرتے ہوئے انہوں نے کہاکہ پارٹی اعلیٰ کمان کی طرف سے اس سلسلے میں تبادلۂ خیال کیا جائے گا۔ انہوں نے کہاکہ وزارت میں توسیع کی جائے یا ردوبدل اس پر ریاستی قائدین میں پہلے اتفاق قائم ہوچکا ہے۔ اس پر اعلیٰ کمان کی رائے معلوم کی جائے گی۔ بعض وزراء کی پارٹی کے مفاد میں وزارت ترک کرنے پر آمادگی کے متعلق انہوں نے کہاکہ پارٹی قیادت سے تبادلۂ خیال کے بعد اس کا فیصلہ لیا جائے گا اور جو بھی وزیر پارٹی کی مفادکی خاطر عہدے کی قربانی دے گا اسے پارٹی کی مناسب ذمہ داری دی جائے گی۔
انہوں نے کہاکہ 20 دسمبر کو ریاست کے سبھی سرکردہ کانگریس قائدین دہلی جائیں گے اور صدر کانگریس راہل گاندھی سے ملاقات کرکے کابینہ میں توسیع کے عمل کو قطعیت دیں گے۔ انہوں نے کہاکہ کانگریس لیجسلیچر پارٹی میٹنگ میں انتہائی خوشگوار ماحول میں اراکین اسمبلی نے اپنے اپنے حلقوں کے مسائل پیش کئے۔ سرکاری گرانٹس کی تقسیم میں مبینہ امتیاز کی شکایات کا مناسب طور پر ازالہ کرنے کا یقین سدرامیا کی طرف سے دلایا گیا اور انہوں نے اس ضمن میں وزیراعلیٰ ایچ ڈی کمار سوامی سے بات کرنے کا وعدہ بھی کیا۔ کانگریس لیجسلیچر پارٹی میٹنگ میں بعض اراکین اسمبلی کی غیر حاضری کے متعلق انہوں نے کہاکہ بیشتر نے کانگریس لیجسلیچر سکریٹری کو مکتوب روانہ کرکے غیر حاضری کی اجازت لے رکھی ہے۔
