بنگلور:21/مارچ(ایس او نیوز) کے پی سی سی اقلیتی کمیٹی کے چیرمین وائی سعیداحمد نے بتایاہے کہ کے پی سی سی اقلیتی کمیٹی کی جانب سے ریاست کے کسی اہم شہر میں اقلیتی خواتین کانفرنس منعقد کرنے کے سلسلہ میں تیاریاں شروع ہوچکی ہیں۔ اس کانفرنس میں ریاست بھر سے صرف اقلیتی طبقہ کی خواتین کو مدعوکیاجائے گا اوراقلیتی خواتین جنہوں نے بیش بہاعوامی وسماجی خدمت انجام دی ہے انہیں تہنیت پیش کی جائے گی ۔ کانفرنس سے وزیر اعلیٰ سدارامیا کے پی سی سی کے صدر ڈاکٹر جی پرمیشور ،کارگزار صدر دنیش گنڈوراؤ اوراقلیتی وزراء شرکت کریں گے اور رواں سال کے بجٹ میں اقلیتوں اور خواتین کے لئے جو اسکیمیں شروع کی گئی ہیں ان سے انہیں روشناس کرایاجائے گا۔ ریاستی اسمبلی انتخابات جواگلے سال ہونے جارہے ہیں اس کے پس منظر میں اقلیتی ڈپارٹمنٹ کی جانب سے ریاست میں چار اقلیتی زونل کنونشن بھی منعقد ہوں گے ماہ مئی میں بنگلور میں پہلاکنونشن منعقد کیاجائے گا اورپھر بلگاوی ، میسور اورکلبرگی اورمنگلورمیں بھی کنونشن منعقد کئے جائیں گے۔ مسٹرسعیداحمد نے کے پی سی سی اقلیتی ڈپارٹمنٹ کی جانب سے وزیراعلیٰ سدارامیا کاشکریہ اداکیا کہ انہوں نے اس مرتبہ اقلیتوں کے لئے 2750کروڑکابجٹ پیش کرکے اقلیتوں کادل جیت لیاہے، بجٹ میں انہوں نے اقلیتوں کے لئے جونئی اسکیمیں جاری کی ہیں۔ ان کے لئے بھی انہوں نے وزیراعلیٰ کی ستائش کی اورکہاکہ 20کروڑ کی لاگت سے محکمہ اقلیتی بہبودکے دفتروں کو قائم کرنے مولانا آزاد بھون کی تعمیر کااعلان قابل تعریف ہے، جہاں وقف افسروں کی تربیت کیلئے بھی سنٹر بنایاجانے والا ہے اس سلسلہ میں انہوں نے وزیربرائے اقلیتی امور واوقاف جناب تنویرسیٹھ کوبھی مبارکباد دی کہ بجٹ سے قبل انہوں نے اقلیتوں کے مختلف طبقات ،وزراء اور اراکین اسمبلی کے ساتھ مشاورتی اجلاس چلائے اور وزیراعلیٰ کوایک میمورنڈم بھی پیش کیاتھا۔