اڈپی 11؍فروری (ایس او نیوز) اڈپی ضلع کے کوٹا شہر میں مانور نامی مقام پر26جنوری کی رات کو بھرت کمار اور یتیش نامی نوجوانوں کاجو دوہرا قتل ہواتھا اس سلسلے میں تحقیقات کررہی پولیس ٹیم نے ڈسٹرکٹ آرمڈ ریزرو فورس (ڈی اے آر)سے وابستہ دو پولیس کانسٹیلوں کوقتل میں تعاون کرنے کے الزام میں گرفتار کر لیا ہے۔

10فروری کو گرفتار شدہ پولیس کانسٹیبلوں کے نام پوَن امین اور ویریندرا اچاریہ بتائے جاتے ہیں۔جن کے بارے میں معلوم ہوا ہے کہ دوہرے قتل کے اصل ملزمین ہریش ریڈی، راج شیکھر ریڈی، مہیش گانیگا اور سنتوش کوندر سے ان کا برسوں پرانا دوستانہ ہے۔ اس وجہ سے انہوں نے اس قتل کو انجام دینے میں ملزمین کی پوری مدد کی۔ پولیس رپورٹ کے مطابق جس رات یہ دوہرا قتل ہوا تھا تو تمام ملزمین ہیبری میں پوَن امین نامی کانسٹیبل کے گھر میں رُکے ہوئے تھے۔ پون امین نے ہریش ریڈی کے لئے سِم کارڈ، موبائل فون اور نقدی وغیرہ کا انتظام کیا تھا۔ قتل کے بعد بھی پون نے ملزمین کو اپنے ایک رشتے دار کے گھر پر چھپائے رکھنے کا انتظام کیا۔پھر 28فروری کو پون نے ملزمین کو مالندور میں واقع اپنے ایک اور رشتے دار کے گھر میں چھپائے رکھا۔اس کے بعد پون اوردوسرے کانسٹیبل ویریندرا اچاریہ نے ملزمین کومختلف مقامات پر فرار ہونے کے لئے کارکاانتظام کردیا۔

پولیس کا کہنا ہے کہ اس نے اس مجرمانہ کارروائی کے لئے استعمال کی گئی کار، موبائل فون اور دیگر اشیاء پون امین اور ویریندرا اچاریہ کے قبضے سے برآمد کرلی ہے۔گرفتاری کے بعد ملزم پولیس کانسٹیبلوں کو کنداپورکی عدالت میں پیش کیاگیا جہاں سے انہیں عدالتی حراست میں بھیج دیا گیا ہے۔اس طرح کوٹا دوہرے قتل کیس کے تعلق گرفتارملزمین کی تعدادبڑھ کر 8ہوگئی ہے۔خیال رہے کہ کلیدی ملزمین ہریش ریڈی اور راج شیکھر ریڈی کے ساتھ 6ملزمین کو پولیس نے پہلے ہی گرفتار کرلیا تھا۔