کوپل کے ایس پی انوپ کمار شیٹی کریں گے ضلع شمالی کینرا میں امن و امان کی نگرانی
سرسی10؍دسمبر(ایس او نیوز)ضلع شمالی کینرا میں مختلف مقامات پر سر ابھارنے والی فرقہ وارانہ کشیدگی کے پس منظر میں امن و شانتی کی نگرانی کرنے کے لئے کوپل ضلع کے ایس پی انوپ کمار شیٹی کو عبوری نگران کی ذمہ داری سونپی گئی ہے۔ خیال رہے کہ کچھ عرصے قبل انو پ کمار شیٹی نے بھٹکل میں اے ایس پی کی ذمہ داری نبھائی تھی۔
کہا جاتا ہے کہ بھٹکل میں خدمات انجام دینے کا جو تجربہ انوپ کمار شیٹی کو ہے اس کی بنیا دپر ایڈیشنل ڈائریکٹر جنرل آف پولیس کی ہدایت کے مطابق انوپ کمار شیٹی نے2دنوں تک شمالی کینرا کے ایس پی ونائک راؤ پاٹل کے ساتھ ہوناور میں امن و امان کی صورتحال پر قابو پانے کی خصوصی ذمہ داری نبھائی۔ پھر اس کے بعد سرسی پہنچ کر وہاں ڈی وائی ایس پی ناگیش شیٹی کے دفتر میں سرکل انسپکٹر گریش اورسب ڈیویژن کے دیگر افسران سے ملاقات کی اور تمام ضروری معلومات حاصل کیں۔اس کے علاوہ سب ڈیویژن میں امن کی بحالی کے تعلق سے پولیس سب انسپکٹروں کے ساتھ خصوصی میٹنگ کی۔بتایا جاتا ہے کہ سرسی کا جو مسلم نوجوان ہوناور سے لوٹتے ہوئے لاپتہ ہوگیا ہے ، اس تعلق سے سرسی میں داخل کی گئی شکایت پر بھی انوپ کمار شیٹی نے تفصیلی جائزہ لیا۔
کہا جاتا ہے کہ بھٹکل، ہوناور، چنداور جیسے علاقوں میں بڑھتی ہوئی بد امنی کے پس منظر میں احتیاطی تدبیر کے طور انوپ کمار شیٹی کو اس ضلع کا ذمہ دار بنایا گیا ہے۔اس کے علاوہ دیگر اضلاع کے افسران بھی ضلع ایس پی ونائک راؤ پاٹل کے ساتھ امن کی بحالی کے لئے تدابیر کررہے ہیں۔