دبئی26فروری(ایس او نیوز/آئی این ایس انڈیا)کپتان وراٹ کوہلی آج یہاں جاری تازہ ترین آئی سی سی ٹیسٹ رینکنگ میں دوسرے مقام کے ساتھ بھارتی بلے بازوں میں سب سے بہترین رینکنگ پرہیں جبکہ آف اسپنر روی چندرن آشون نے گیند بازوں اور آل راؤنڈروں کی فہرست میں اپنی سب سے اوپر جگہ برقراررکھی ہے۔کل پونے میں آسٹریلیا کے خلاف پہلے ٹیسٹ میں شکست کا سامنا والی بھارتی ٹیم کی درجہ بندی پراس ہار کا اثر نہیں پڑاہے۔میچ میں 64اور 10رنز کی اننگز کھیلنے والے بھارت کے اوپنرلوکیش راہل کیریئرکی بہترین46ویں پوزیشن پرہیں۔آسٹریلوی کھلاڑیوں میں ا سٹیو اوکیفے،اسٹیواسمتھ اورمیٹ رینشا کو کافی فائدہ ہواہے۔آسٹریلیاکی333رنز کی فتح کے دوران سنچری جڑنے والے اسمتھ ٹاپ پربرقرارہیں اورکیریئرکی بہترین939ریٹنگ پوائنٹس پرپہنچ گئے ہیں۔آئی سی سی کے بیان کے مطابق اسمتھ نے ٹیسٹ بلے بازوں کی درجہ بندی میں ٹاپ پراپنی پوزیشن مضبوط کرنے کے علاوہ چھٹے بہترین ریٹنگ پوائنٹس حاصل کئے ہیں۔پونے میں 37اور 109رنزکی اننگز کھیلنے والے اسمتھ کو چھ ریٹنگ پوائنٹس کا فائدہ ہواہے۔انہوں نے دوسرے مقام پر موجود کوہلی پر 66پوائنٹس کی برتری حاصل کررکھی ہے۔انگلینڈ کے جو روٹ ان سے 91پوائنٹس پیچھے 848پوائنٹس کے ساتھ تیسرے نمبرپرہیں۔