سیلاب زدہ کورگ کیلئے اضافی تعاون کا اعلان فی کنبہ 50ہزار روپئے رقم دینے کا فیصلہ
بنگلورو23تمبر(ایس او نیوز)کورگ ضلع میں حال ہی میں ہوئی موسلا دھار بارش اور سیلاب کی وجہ سے کئی گھر تباہ وبرباد ہوگئے ۔ متاثرہ کنبوں کیلئے کپڑے اور روز مرہ کی ضروریات کی خریداری کے مقصد سے وزیر اعلیٰ ریلیف فنڈ کے تحت فی کنبہ 50ہزار روپئے اضافی رقم جاری کرنے کا ریاستی حکومت نے فیصلہ کیا ہے۔ اس بات کی اطلاع ریاستی وزیر برائے مالگزاری آروی دیش پانڈے نے دی ۔
اس ضمن میں اخباری اعلامیہ جاری کرتے ہوئے دیش پانڈے نے کہا کہ قدرتی آفت کی زد میں آئے کنبوں اور مکانوں کو قومی اور ریاستی راحت فنڈ کے تحت اضافی تعاون دینے کا فیصلہ کیا گیا ہے ۔انہوں نے کہا کہ سیلاب زدہ کورگ کے دورہ اور معائنہ کے موقع پر متاثرین نے مجھے، وزیراعلی کمار سوامی ، نائب وزیراعلیٰ جی پرمیشور اور ضلع نگراں کار وزیر سے درخواست کی تھی کہ سیلاب کی وجہ سے یہاں بہت بڑی تباہی آئی ہے ۔ سیلابی ریلے کی زد میں آکر کئی مکانات بہہ گئے ہیں ،کئی مکانات زمین کھسکنے سے ٹوٹ پھوٹ گئے ہیں ۔ یہاں بہت بڑا مالی خسارہ ہوا ہے ۔ اس لئے یہاں راحت کاری فنڈ کے تحت جاری کی جانے والی رقم میں اضافہ کرناچاہئے ۔ متاثرین کی درخواست کو سنجیدگی سے لیتے ہوئے اضافی تعاون فراہم کرنے کا فیصلہ کیا گیا ہے ۔ اضافی راحت کاری معاوضہ دینے کیلئے 5کروڑ78لاکھ روپئے خرچ ہوں گے ۔