جرمن وزیر خارجہ اپنی حدود میں رہیں: اردگان
انقرہ،20اگست(ایس او نیوز؍آئی این ایس انڈیا)ترک صدر رجب طیب ایردوآن نے جرمنی میں آباد ترک نژاد باشندوں کے لیے اپنے متنازعہ پیغام کے ردعمل پر جرمن حکومت کو شدید تنقید کا نشانہ بنایا ہے۔ ایردوآن نے جرمن وزیر خارجہ کو اپنی حدود میں رہنے کا مشورہ دیا ہے۔ترکی اور جرمنی کی حکومتوں کے درمیان گزشتہ کچھ عرصے سے تعلقات تناؤ کا شکار ہیں۔ اس کی وجہ ترکی کی طرف سے ناکام فوجی بغاوت کے بعد اپنے ملک میں جاری کریک ڈاؤن کے تحت کیے جانے والے سخت اقدامات پر جرمن حکومت کے تحفظات سے لے جرمنی کی طرف سے ترک وزراء کو جرمنی میں آباد ترک نژاد باشندوں سے خطاب کی اجازت نہ دینا وغیرہ شامل ہیں۔ ترک حکومت کے کریک ڈاؤن کے تحت متعدد جرمن شہریوں کی گرفتاری بھی تعلقات میں تناؤ کی ایک بڑی وجہ ہے۔ انہی میں سے ایک جرمن جریدے کے ترک نژاد جرمن صحافی کی ترکی میں حراست کا معاملہ بھی ہے۔ ترک حکومت ڈینیس یوچیل کو ترکی کے خلاف کام کرنے کے الزام میں قید میں رکھے ہوئے ہے۔ترک صدر رجب طیب ایردوآن نے زور دیا ہے کہ جرمنی میں آباد ترک نژاد جرمن شہری قدامت پسند سیاستدان انگیلا میرکل کو ووٹ دینے کی غلطی نہ کریں۔ انہوں نے دعویٰ کیا ہے کہ چانسلر میرکل کی سیاسی جماعت ترکی کی دشمن ہے۔
ان حالات میں ترک صدر رجب طیب ایردوآن نے جمعہ 18اگست کو اپنے ایک پیغام میں جرمنی میں آباد ترک باشندوں کو کہا تھا کہ وہ جرمن چانسلر انگیلا میرکل اور ان کے ساتھ اتحاد میں شامل جماعت کو ستمبر میں ہونے والے عام انتخابات میں ووٹ نہ دیں۔ ان کے اس بیان پر برلن کی طرف سے شدید ردعمل سامنے آیا تھا۔
جرمن چانسلر انگیلا میرکل کا ترک نژاد باشندوں کے لیے ایردوآن کے پیغام کے ردعمل میں کہنا تھا، ہم کسی کو بھی اور اس میں صدر ایردوآن بھی شامل ہیں، جرمن شہریوں کے اس حق کی نفی کی اجازت نہیں دیں گیجو انہیں پابندیوں سے آزاد ہو کر ووٹ دینے کے لیے حاصل ہے۔ بھلے ان شہریوں کے اجداد کا تعلق ترکی سمیت کہیں سے بھی ہو۔
جرمن وزیر خارجہ زیگمار گابریئل نے بھی شدید الفاظ میں ترک صدر رجب طیب ایردوآن کے پیغام کی مذمت کرتے ہوئے اسے جرمنی کی خودمختاری میں دخل اندازی کا ایک ایسا عمل قرار دیا جس کی کوئی اور مثال نہیں ملتی۔برلن حکومت کے ان بیانات کے بعد ترک صدر رجب طیب ایردوآن نے ہفتہ 19اگست کو ترک صوبہ دینیزلی میں اپنے حامیوں سے خطاب کرتے ہوئے جرمن وزیر خارجہ زیگمار گابریئل کے بارے میں کہا، ان کو اپنی حدود معلوم نہیں ہیں۔ آپ کون ہیں ترکی کی صدر سے بات کرنے والے۔ اپنی حدود میں رہیں۔ وہ ہمیں سبق سکھانے کی کوشش کر رہے ہیں۔۔۔ کتنا عرصہ ہو گیا ہے آپ کو سیاست میں؟ کتنی عمر ہے آپ کی؟۔
ترک صدر رجب طیب ایردوآن نے صوبہ دینیزلی میں اپنے حامیوں سے خطاب کرتے ہوئے جرمن وزیر خارجہ زیگمار گابریئل کے بارے میں کہا کہ ان کو اپنی حدود معلوم نہیں ہیں۔اپنے اس خطاب نے ترک صدر نے ایک بار پھر جرمنی میں آباد ترک باشندوں کے لیے اپنا یہ متنازعہ پیغام بھی دہرایا کہ وہ میرکل کی جماعت کرسچن ڈیموکریٹک یونین CDUاور مخلوط حکومت میں شامل جماعت سوشل ڈیموکریٹک پارٹی SPDکو ووٹ نہ دیں۔