بنگلورو،20اکتوبر (ایس او نیوز؍عبدالحلیم منصور) شہر میں پچھلے دنوں ہوئی موسلادھار بارش کے سبب سڑکوں پر پڑنے والے گڈھوں کو بند کرنے کیلئے کل رات وزیر برائے ترقیات بنگلور کے جے جارج اور میئر سمپت راج کی نگرانی میں بڑے پیمانے پر مہم شروع کی گئی۔ بی بی ایم پی کمشنر منجوناتھ پرساد کی موجود گی میں ان دونوں نے رات دو بجے سے صبح چھ بجے تک شہر کے مختلف علاقوں کا دورہ کرکے سڑکوں کی مرمت کے کام کو یقینی بنایا اور جابجا کام کے معیار کا معائنہ کیا۔ وزیر موصوف نے معائنہ کا سلسلہ چالوکیہ سرکل سے شروع کیا اور یہاں جب انہوں نے سڑکوں پر چند گڈھوں کو مرمت کئے بغیر دیکھا تو افسران اور انجینئروں کو طلب کرکے فوری طور پر انہیں پر کرنے کی ہدایت جاری کی۔ بعد میں وہ ونسر مینر برڈج کے پاس پہنچے جہاں سڑک پر ایک بڑا گڈھا بن گیاتھا، مسٹر جارج نے فوری طور پر کنڑاکٹر اور مزدوروں کو طلب کیا اور اپنی موجودگی میں اس گڈھے کو پر کیا۔ انہوں نے ہدایت دی کہ گڈھوں کو جوں کا توں بند نہ کیاجائے، بلکہ انہیں اس حساب سے بند کیا جائے کہ دوبارہ بارش کی صورت میں یہ گڈھے بحال نہ ہونے پائیں۔ بعد میں انہوں نے گنگین ہلی کا دورہ کیا اور وہاں سڑکوں کی مرمت کیلئے جاری کام کا جائزہ لیا۔ انہوں نے بی بی ایم پی افسران کو ہدایت دی کہ آج رات ہی شہر بھر میں گڈھوں کو بند کرنے کاکام تیزی سے مکمل کرکے کل تک انہیں رپورٹ پیش کی جائے۔ بی ای ایل روڈ پر بی بی ایم پی عملے نے گڈھے بند کرنے والی مشین پیتھان کی مدد سے گڈھے بند کرنے کاکا م جاری رکھا۔ بعد میں انہوں نے ہبال فلائی اوور پر سڑک کی مرمت کے کام کا جائزہ لیا۔ سنجے نگر کراس پہنچ کر انہوں نے یہاں کنٹراکٹر کی طرف سے گڈھے بند کرنے کیلئے اپنائے گئے طریقۂ کار کا معائنہ کیا اور ہدایت دی کہ اس کام کے معیار کو بہتر رکھا جائے ،تاکہ دوبارہ عوام کو سڑکوں کی صورتحال کے متعلق شکایت کا موقع نہ ملے۔ اس موقع پر اخباری نمائندوں سے بات چیت کرتے ہوئے مسٹر جارج نے بتایاکہ بارش کے سبب شہر میں بیشتر سڑکیں متاثر ہوئیں اور تقریباً 20ہزار گڈھے بن گئے تھے۔ میئر سمپت راج اور بی بی ایم پی کمشنر منجوناتھ پرساد کی نگرانی میں 90 فیصد گڈھوں کو بند کرنے کا کام مکمل کرلیا گیا ہے اور باقی گڈھوں کو بھی ایک دو دن میں بھر دیا جائے گا۔