ابوجا،27؍فروری(ایس او نیوز؍آئی این ایس انڈیا)شمالی نائجیریا سے بدھ کے دن اغوا کیے جانے والے دو جرمن ماہرینِ آثار قدیمہ کو رہا کر دیا گیا ہے۔ پولیس نے اتوار کے دن بتایا کہ اغواکاروں نے ہفتے کی رات صوبے کاڈونا کی ایک شاہراہ پر ان دونوں جرمن باشندوں کو چھوڑ دیا تھا۔ پولیس ترجمان عثمان علیو کے مطابق دونوں محققین خیریت سے ہیں۔ تاہم یہ معلوم نہیں ہو سکا کہ آیا ان کی رہائی کی خاطر کوئی تاوان دیا گیا ہے۔ مغربی افریقی ممالک میں تاوان کے لیے غیر ملکیوں کو اغوا کرنا ایک معمول کی بات ہے۔