بنگلورو، 29؍ستمبر(ایس او نیوز) لوک سبھا میں کانگریس پارٹی لیڈر ملیکارجن کھرگے نے وزیراعظم نریندر مودی کو بعض کانگریس قائدین کی طرف سے چور قرار دئے جانے کا دفاع کیا ہے۔ اخباری نمائندوں سے بات چیت کرتے ہوئے انہوں نے کہاکہ رافیل طیارے کی خریداری میں جس طرح کا کرپشن ہوا ہے اسے دیکھتے ہوئے اس کے لئے ذمہ دار لوگوں کو چور نہیں بلکہ اس سے بڑھ کر کہنا چاہئے تھا۔

انہوں نے کہاکہ رافیل سودے کے معاملے میں سرکاری کمپنی سے دھوکہ کرکے وزیراعظم نے ایک انفرادی کمپنی کو فائدہ پہنچانے کا کام کیا ہے، یہ ملک سے دغا نہیں تو اور کیا ہے؟۔ مرکزی حکومت کی طرف سے ایچ اے ایل کی بجائے اس سودے میں نجی کمپنی کو شامل کرنے کے لئے کئے گئے اصرار کا انکشاف خود فرانس کے سابق صدر اولان نے کیا ہے۔ اس سے بڑھ کر اور کیا ثبوت چاہئے۔ انہوں نے کہاکہ رافیل معاملے میں مودی اگر بے داغ ہیں تو اپنی خاموشی توڑ کر جواب دیں صرف ترجمانوں کے ذریعے وضاحت کرنے کی کیا ضرورت ہے۔ مودی کو اگر اپنے پاک دامن ہونے کا اتنا ہی یقین ہے تو معاہدے کے تمام حقائق عوام کے سامنے لائیں۔ یہ معاہدہ ملک کا اتنا بڑا دفاعی راز نہیں ہے کہ اس سے عوام کی نظروں سے چھپادیا جائے۔ کھرگے نے کہاکہ معاہدے کے مختلف نکات پر جو اعتراضات کئے جارہے ہیں ان کی جانچ کے لئے مشترکہ پارلیمانی کمیٹی تشکیل دی جائے تاکہ سچائی سامنے آسکے۔ ان تمام کو ٹالنے کی کوشش اس بات کا ثبوت ہے کہ مودی رافیل سودے میں ہوئی مبینہ بے قاعدگیوں کو چھپانا چاہتے ہیں۔ ایسے شخص کو جس زبان میں نکتہ چینی کی جانی چاہئے اسی زبان میں کی جارہی ہے اسی لئے اس پر اعتراض کو وہ بے جا سمجھتے ہیں۔