پڑوسی ریاست کیرالہ میں اب چوتھا انٹرنیشنل ائرپورٹ افتتاح کے لئے تیار؛ دسمبر 9 کو افتتاح ہونے کی توقع
مینگلور 5/اکتوبر (ایس او نیوز)پڑوسی ریاست کیرالہ کے کنّور میں انٹرنیشنل ائرپورٹ اب افتتاح کے لئے تیار ہے اور توقع کی جارہی ہے دسمبر 9 کو اس ائرپورٹ کا افتتاح ہوگا۔
خیال رہے کہ ریاست تمل ناڈو کے بعد کیرالہ ملک کی دوسری ریاست ہوگی جہاں چار انٹرنیشنل ائرپورٹ کے ذریعے مسافر باہر ممالک کا سفر کرسکیں گے۔
ذرائع سے ملی اطلاع کے مطابق ڈائرکٹوریٹ جنرل آف سیول اویشن نے کنّور انٹرنیشنل ائرپورٹ کو ائروڈروم لائسنس جاری کردیا ہے، جس کے بعد ائرپورٹ کے افتتاح کی تاریخ کا اعلان کیا گیا ہے۔
خبر ملی ہے کہ ائرپورٹ کے افتتاح کے لئے صدر ہند رام ناتھ کوند کو مدعو کرنے کی کوشش جاری ہے۔ بتایا گیا ہے کہ اس ائرپورٹ میں تمام جدید سہولیات فراہم کی گئی ہے، اس کا رن وے فی الوقت 3,050 میٹر لمبا ہے، جبکہ اس کو چار ہزار میٹر توسیع دینے کا کام جاری ہے۔
خیال رہے کہ کیرالہ میں ترویندرم انٹرنیشنل ائرپورٹ، کوچین انٹرنیشنل ائرپورٹ اور کالی کٹ انٹرنیشنل ائرپورٹ کے بعد اب کنّور انٹرنیشنل ائرپورٹ کے ذریعے مسافر ملک سے باہر ممالک کا دورہ کرسکیں گے۔ یاد رہے کہ کنّور، مینگلور سے قریب 140 کلو میٹر کی دوری پر واقع ہے۔