کیرل حکومت کی بس کرایہ بڑھانے کا اعلان
تروونتپورم، 14 فروری (ایس او نیوز؍آئی این ایس انڈیا) کیرل حکومت نے آج سرکاری اور نجی بسوں کے کرایہ میں اضافہ کا اعلان کیا جس کا نفاذ ایک مارچ سے ہوگا ۔ عام بس سروس کا کم ازکم کرایہ آٹھ روپے ہوں گے ، پہلے اس کا کرایہ سات روپے تھا۔ فاسٹ پسنجر سروس کا کرایہ 10 روپے کی جگہ 11 رو پیہ ہوگا ۔کم سے کم کرایہ کے ساتھ ساتھ تمام زمرہ کی سروس کے لئے فی کلو میٹر فیس بھی بڑھا دی گئی ہے ۔یہ اضافہ آٹھ پیسے سے چھ روپے کے درمیان ہے۔کیرل کے وزیر اعلی پنارائی وجین نے یہ فیصلہ کل یہاں ہوئی کابینہ کی میٹنگ میں لیا۔ وزیر ٹرانسپورٹ اے کے ششی دھرن نے صحافیوں کو بتایا کہ ٹرانسپورٹ کے شعبہ میں استحکام کے لیے اس کا اضافہ ضروری تھا ۔2014 میں بس کے کرایہ کا جائزہ لیا گیا تھا ۔