کنّور 3؍اکتوبر ( ایس او نیوز)کیرالہ کے دورے پر آئے ہوئے بی جے پی کے صدر امیت شاہ نے لیفٹ ڈیموکریٹک فرنٹ (ایل ڈی ایف)کی ریاستی حکومت پر سخت ترین تنقید کرتے ہوئے کہاکہ بی جے پی اور آر ایس ایس کے کارکنان کے سیاسی قتل کے لئے ریاستی وزیر اعلیٰ پینا رائے وجیان براہ راست ذمہ دار ہیں۔
امیت شاہ کا کہنا ہے کہ سال2001سے اب تک ریاست میں آرایس ایس اور بی جے پی کے 120کارکنان قتل کردئے گئے ہیں۔ اس سلسلے میں سی پی آئی (ایم) کی قیادت میں بر سراقتدارریاستی حکومت کو بتانا ہوگا کہ آخر اس قتل و غارت گری کے لئے کون ذمہ دار ہے۔کنور میں ایک اجلاس سے خطاب کرتے ہوئے امیت شاہ نے کہا: "میں وزیر اعلیٰ سے پوچھنا چاہتا ہوں کہ آخر کیرالہ میں آر ایس ایس اور بی جے پی کے کارکنان کو کس نے قتل کیا؟ اگر وزیر اعلیٰ کے پاس اس کا جواب نہیں ہے تو پھرمیں کہتا ہوں کہ وزیر اعلیٰ وجیان ہی اس کے لئے ذمہ دار ہیں۔ سیاسی قتل کی ان120 وارداتوں میں کم ازکم 84وارداتیں وزیر اعلیٰ کے اپنے حلقے کنور میں ہی انجام دی گئی ہیں۔"
بی جے پی صدرامیت شاہ کیرالہ میں "جن رکھشا یاترا"یعنی عوام کے تحفظ کے لئے مارچ کا افتتاح کرنے کے لئے پہنچے ہیں۔کنّور کے پاینّور سے ریاست گیر پیمانے پر شروع ہونے والے اس مارچ کا اختتام 17اکتوبر کو تھیرواننت پورم میں ہونے والا ہے۔امیت شاہ نے اس موقع پراعلان کیا کہ4اکتوبر سے تمام ریاستی صدر مقامات پر سی پی آئی (ایم) طرف سے بی جے پی اور آر ایس ایس رضاکاروں کے قتل کی مخالفت میں دو ہفتے تک پدیاترا چلائی جائے گی۔بی جے پی کے ذرائع کے مطابق"سیاسی قتل اور جہادی دہشت گردی "کے خلاف احتجاج کے طور پر 5اکتوبر کو پدیاتراکرتے ہوئے بی جے پی چیف امیت شاہ وزیراعلیٰ کی رہائش گاہ کے سامنے سے گزریں گے۔
اس دوران پاینّور کے قریب اس وقت کشیدگی اور تناؤ کا ماحول پیدا ہوگیا جب بی جے پی کے رضاکاروں سے بھری ایک بس پر شرپسندوں نے سنگ باری کی جس سے بس کے سامنے والا شیشہ (ونڈ اسکرین) چورچور ہوگیا۔لیکن پولیس نے بروقت حالات کو قابو میں کرلیا۔