مینگلور 25 فروری (ایس او نیوز) ہندو شدت پسند تنظیموں کے احتجاج اور مینگلور بندکے اعلان کے دوران بھلے ہی شہر کے کچھ مضافاتی علاقوں میں بسوں پر پتھرائو اور راستوں پر رکائوٹیں کھڑی کرکے  لوگوں کے اندر ڈر اور خوف پیدا کرنے کی کوشش کی گئی، مگر ان سب کے بائوجود کیرالہ کے وزیراعلیٰ پینرائی وجئین ٹرین پر سوار ہوکر مینگلور پہنچ گئے۔ کرتا اور دھوتی پہنے ایک عام آدمی کی طرف پینرائی وجئین ریلوے اسٹیشن اُترے، جہاں پولس کا سخت بندوبست کیا گیا تھا۔ یہاں سے وہ سیدھے وارتھا بھارتی کی نئی عمارت کا سنگ بنیاد رکھنے وارتھا بھارتی کے پروگرام کے لئے چلے گئے۔ دوپہر تین بجے وہ قومی یکجہتی ریلی میں شریک ہوں گے۔

ریلوے اسٹیشن پر سی پی آئی (ایم) کے لیڈران ان کے استقبال کے لئے موجود تھے۔

اُدھر شرپسندوں کی طرف سے بسوں پر پتھرائو کا سلسلہ جاری رہا، تازہ اطلاعات کے مطابق مینگلور اسٹیٹ بینک سے عطاور۔منگلادیوی کے لئے نکلے ایک بس سمیت مزید کچھ بسوں پر بھی پتھرائو کرکے بسوں کی ونڈ اسکرین کو نقصان پہنچانے کی اطلاعات موصول ہوئی ہیں۔

شہر میں ویسے حالات مکمل قابو میں ہیں اور حالات پر گہری نظر رکھنے پولس کے اعلیٰ حکام شہر میں ہی موجود ہیں۔ اہم ناکوں پر پولس کا سخت پہرہ بٹھایا گیا ہے۔