کمار سوامی کی حلف برداری تقریب میں شامل ہوں گے اروند کجریوال
نئی دہلی،21؍مئی ( ایس او نیوز؍آئی این ایس انڈیا ) دہلی کے وزیر اعلیٰ اروند کجریوال جنتا دل (سیکولر) لیڈر کمار سوامی کی حلف برداری تقریب میں شامل ہوں گے۔ کمار سوامی کرناٹک کے وزیر اعلی کے طور پر حلف لینے جا رہے ہیں۔ ایک سرکاری افسر نے بتایا کہ کجریوال کمار سوامی کی حلف برداری تقریب میں موجود رہیں گے۔ انہیں سابق وزیر اعظم ایچ ڈی دیوگوڑا نے مدعو کیا ہے۔ کمار سوامی وزرات کے عہدہ کے لیے افراد کے انتخاب کے معاملہ پر گفتگو کرنے کے لیے کانگریس صدر راہل گاندھی اور پارٹی کی سینئر لیڈر سونیا گاندھی سے ملاقات کی غرض سے آج دہلی میں مقیم ہیں۔زعفرانی ٹولہ بی جے پی کے پاس اکثریت نہ ہونے کی وجہ سے یدی یورپا نے اسمبلی میں فلور ٹیسٹ سے پہلے ہی ہفتہ کو وزیر اعلی کے عہدے سے ڈرامائی انداز میں استعفیٰ دے دیا تھا۔ اس کے بعد کمار سوامی نے گورنرسے ملاقات کی اور کہا کہ انہیں حکومت بنانے کے لئے مدعو کیا جائے۔ کرناٹک میں 12 مئی کو اسمبلی کا انتخاب ہوا تھا، جس کا نتیجہ معلق رہا تھا۔ بی جے پی 104 کی نشست جیت کر سب سے بڑی پارٹی کے طور پر سامنے آئی تھی۔کمار سوامی 23 مئی کو کرناٹک کے وزیر اعلیٰ کے عہدے کا حلف لیں گے ۔