امرتسر پہنچنے پر کیجریوال کو دکھائے گئے سیاہ پرچم
امرتسر، 25؍ستمبر(ایس او نیوز ؍آئی این ایس انڈیا )دہلی کے وزیراعلیٰ اروند کجریوال کے پچھلی بار ٹرین سے پنجاب پہنچنے پر بی جے پی اور کانگریس کے کارکنوں نے ان کے خلاف نعرے بازی کی تھی۔اس بار وہ فلائٹ سے پنجاب پہنچے لیکن ان کا قافلہ جب یہاں ہوائی اڈے سے باہر نکالا تو خاتون کانگریس کے کارکنوں نے انہیں سیاہ پرچم دکھایا ۔پنجاب خاتون کانگریس کی صدر ممتا دت کی قیادت میں کارکنوں کے ایک بڑے گروپ نے کیجریوال حکومت پر دارالحکومت دہلی میں مبینہ بدانتظامی کا الزام لگایا۔کیجریوال یہاں اسمبلی انتخابات کے لیے انتخابی مہم انجام دینے پہنچے تھے۔شری گرو رام داس بین الاقوامی ہوائی اڈے پر فلائٹ سے اترنے کے بعد کیجریوال براہ راست جالندھر گئے جہاں انہیں اگروال کمیونٹی کے ایک پروگرام میں حصہ لینا تھا۔کانگریس کارکنوں نے تختیاں لے رکھی تھیں جن پر ’کیجریوال واپس جاؤ‘لکھا تھا۔کارکنوں نے الزام لگایا کہ ان کے ممبر اسمبلی خواتین کی عصمت دری میں ملوث ہیں اور ایسے لوگوں کے لیڈر کو پنجاب میں برداشت نہیں کیا جائے گا۔دت نے یہ بھی الزام لگایا کہ مظاہرے کے دوران ایک مرد سپاہی نے انہیں بری طرح سے دھکا دے دیا، جس سے انہیں چہرے پر چوٹیں آئیں۔دیگر خواتین کانگریس کارکنوں نے الزام لگایا کہ جب انہوں نے کیجریوال کے قافلے میں رکاوٹ پیدا کرنے کی کوشش کی تو پولیس اہلکاروں نے انہیں دھکا دیا۔واقعہ کے بعد کانگریس کارکنوں نے سڑک کے بیچوں بیچ ایک گھنٹے تک مظاہرہ کیا۔