دہلی میں آبی جماؤ کے لیے ذمہ دار وزیر کوکیجریوال فورا برخاست کریں : مارکنڈے کاٹجو
نئی دہلی، 31؍اگست(ایس او نیوز/آئی این ایس انڈیا) دہلی کے وزیراعلیٰ اروند کیجریوال کو دہلی میں آبی جماؤ کے لیے ذمہ دار وزیر کو فوری طور پر برطرف کر دینا چاہیے ، یہ بات سپریم کورٹ کے سابق جج جسٹس مارکنڈے کاٹجو نے کہی ہے۔جسٹس کاٹجو نے اپنے فیس بک پیج پر اس سے متعلق پوسٹ ڈالا ہے۔پریس کونسل آف انڈیا کے سابق چیئرمین جسٹس کاٹجو نے کہا کہ دہلی میں بارش کی وجہ سے آبی جماؤ سے لوگوں کو کافی دقتوں کا سامنا کرنا پڑا۔انہوں نے کہا کہ حکومت کی اس ناکامی کے لیے کسی کو ذمہ داری لینی چاہیے ۔انہوں نے بتایا کہ حال ہی میں ایک فلائٹ میں ایک ہندوستانی جو سنگاپور میں رہتا ہے، نے انہیں بتایا کہ سنگاپور میں کبھی بھی آبی جماؤ کی حالت نہیں ہوتی ہے۔صرف ایک بار ایسا ہوا تھا وہ بھی شہر کے ایک علاقے میں، یہ بھی صرف دو گھنٹے میں ٹھیک کر دیا گیا تھا، حالانکہ اس کا نتیجہ یہ ہوا کہ متعلقہ وزیر کو اسی دن کابینہ سے برطرف کر دیا گیا۔ساتھ ہی کئی سینئر افسر ان اور حکومت ٹی وی کے ذریعے اور دیگر ذرائع سے لوگوں سے گڑگڑاتے ہوئے معافی مانگتی رہی۔اس کے ساتھ ہی حکومت نے مستقبل میں ایسا نہیں ہونے دینے کا وعدہ بھی کیا۔حکومت نے واقعہ پر صفائی دیتے ہوئے بتایا کہ آبی جماؤ ایک جگہ پر نالے کے جام ہو جانے کی وجہ سے ہوا تھا اور جو افسر اس کے لیے ذمہ دار تھا اس کو برخاست کر دیا گیا ہے ۔کیا اس طرح کی پریشانی کے لیے ہندوستان میں کوئی ذمہ داری لے گا؟جسٹس کاٹجو نے کہا کہ کہ اروند کیجریوال نے نئی طرح کی سیاست شروع کی ہے، اس لیے انہیں اس آبی جماؤ کے لیے ذمہ دار وزیر اور سینئر افسران کو برطرف کر دینا چاہیے ۔