کیدارناتھ سانحہ پر مودی الٹاہی جھوٹ بول رہے ہیں، کانگریس نے مودی سرکارپرہی رقم روک کررکھنے پرتنقیدکی
نئی دہلی، 20 اکتوبر (ایس او نیوز؍آئی این ایس انڈیا ) کانگریس نے وزیر اعظم نریندر مودی پر کیدارناتھ سانحے کے بعد تعمیر نو کے کاموں کے سلسلے میں غلط بیانی کرنے کا الزام لگاتے ہوئے آج کہا کہ موجودہ مرکزی حکومت نے ریاست میں راحت اور باز آبادکاری کے کاموں کے لیے مقررہ رقم جاری نہیں کی ہے۔کانگریس کے ترجمان آر پی این سنگھ نے یہاں پارٹی ہیڈکوارٹر میں باقاعدہ پریس بریفنگ میں کہا کہ مسٹر مودی بابا کیدارناتھ کے دربارمیں تکبرکی زبان بول رہے ہیں اور غلط بیانی کرکے لوگوں کو گمراہ کر رہے ہیں۔انہوں نے کہا کہ سال 2013 میں کیدارناتھ سانحہ کے وقت مرکز اور اتراکھنڈ میں کانگریس کی حکومتیں تھیں اور دونوں حکومتوں نے فوری طورپرامدادی مہم شروع کرتے ہوئے تعمیرِنو ر زور دیاتھا۔