ڈانڈیلی، 6؍جون(ایس او نیوز)ریاست کرناٹکا میں پہلی مرتبہ کالی ندی میں منعقد ہونے والے بین الاقوامی کایاکنگ اتسوا بڑی کامیابی کے ساتھ اختتام پزیر ہوا۔ ڈانڈیلی میں ہونے والے اس مقابلے کے پہلے مرحلے میں سلولم زمرے میں بین الاقوامی شرکاء کے لئے مقابلہ رکھاگیا جس میں60سے زیادہ مقابلہ بازوں نے حصہ لیا۔

دوسرے دن بگینرز(نو آموز) افراد کے لئے مقابلہ تھاجس میں مرد و خواتین کے علاوہ بچوں نے بھی حصہ لیا۔ اس میں شرکاء کی تعداد 150تھی۔اس کے بعد انٹرمیڈیٹ زمرے میں16سال سے 60سال کی عمر تک کے تربیت یافتہ کایاکنگ کے کھلاڑیوں نے حصہ لیا۔اس میں ایک 12سالہ لڑکے دادا پیر نے ماہر تربیت یافتہ کھلاڑیوں سے بھی بہتر مظاہرہ کرتے ہوئے دیکھنے والوں کا دل جیت لیا۔

تیسرے دن کایاکنگ میراتھن مقابلہ منعقد ہوا۔گنیش کڈی سے مولنگی تک 10کیلو میٹر لمبے میراتھن میں 44مقابلہ بازوں نے شرکت کی۔اس میراتھن کے دوران خصوصی مہارت اور کسرتوں کا مظاہرہ سب کی دلچسپی کا سبب بنا۔یوتھ اینڈ اسپورٹس محکمے کے افسران کے علاوہ جنرل تمیا اکیڈیمی کے ڈائریکٹر انوپم اگروال کیرتی اس موقع پر حاضر تھے۔