پلکڑ،20؍اپریل (ایس او نیوز؍ آئی این ایس انڈیا )کیرالہ کے پلکڑ کی رہائشی آرٹسٹ درگا ملاٹھی کے گھر میں کچھ نامعلوم افراد کے پتھر پھینکنے کا واقعہ سامنے آیا ہے۔رپورٹس کے مطابق درگا نے کٹھوا ریپ کیس معاملے میں دو قابل اعتراض پینٹنگ بنا کر ہندو دیوی دیوتاؤں کو اس واقعہ کے لئے ذمہ دار بتایا تھا۔اس سے پہلے فیس بک پر بھی درگا کو کئی لوگوں کی طرف سے گالیاں دی گئی تھیں۔جمعہ کو کچھ لوگوں نے درگا کے پلکڑ واقع گھر میں پتھر بازی کی اور ان کے گھر کے سامنے کھڑی جیپ کے شیشے توڑ دیے۔جس کارٹون پر تنازعہ ہوا ہے اس میں ترشول کو انسانی عضو تناسل کی طرح دکھایا گیا تھا، اس کے اوپر بھارتیہ جنتا پارٹی (بی جے پی)کے پرچم کو دکھایا گیا تھا۔بتایا جا رہا ہے کہ درگا پہلے بھی اس طرح کے بہت سے کارٹون بنا چکی ہے۔رپورٹیں کے مطابق درگا کے گھر پر جمعرات دیر رات حملہ کیا گیا۔درگا نے بتایا کہ انہیں اور ان کے دوستوں کو سوشل میڈیا پر گزشتہ کئی دنوں سے نشانہ بنایا جا رہا ہے۔انہوں نے کہاکہ ہم کو جنسی تشدد کا نشانہ بنایا جا رہا ہے۔صرف مجھ پر ہی نہیں بلکہ میرے کارٹون پر کمنٹ کرنے والے میرے دوستوں کو بھی نشانہ بنایا جا رہا ہے۔گھر پر پتھر بازی کے واقعہ کے بعد درگا نے مقامی پولیس اسٹیشن میں شکایت درج کروائی ہے۔درگا نے یہ بھی کہا ہے کہ وہ اس معاملے پر میڈیا کی خاموشی کو لے کر فکر مند ہیں۔انہوں نے اس کارٹون پر معافی مانگنے سے بھی صاف انکار کر دیا ہے۔