کاسرگوڈ،29؍مئی (ایس او نیوز)بنٹوال سے تعلقہ رکھنے والا شادیوں کا شوقین شخص ساتویں مرتبہ شادی رچانے کے بعد پولیس کے شکنجے میں پھنس گیا ہے۔ مختلف شہروں میں یکے بعد دیگرے شادیاں رچانے اور پھر اپنی بیویوں کو دھوکہ دے کر زیورات اور نقدی کے ساتھ فرار ہونے والے شخص کا نام عبدالقادر (۴۸سال) بتایا جاتا ہے ، جو کہ بنٹوال تعلقہ کے بولانتور نامی گاؤں کا رہنے والا ہے۔

کالّوراوی نامی مقام پر جہاں فی الحال عبدالقادر مقیم تھا، ایک خاتون نے پولیس میں شکایت درج کی تھی کہ عبدالقادر اس کے ساتھ شادی رچانے اور کچھ دن قیام کرنے کے بعد اس کے پاس سے ایک لاکھ روپے نقد اور 80گرام سونے کے زیورات لے کر فرار ہوگیا ہے۔پولیس اس کی تلاش میں لگی ہوئی تھی کہ عبدالقادر ساتویں مرتبہ شادی رچاتے ہوئے کاسرگوڈ سے ایک اور دلہن لے کر اپنے گھر آگیا۔ اس بات کی اطلاع ملتے ہی سائبر کرائم ڈپارٹمنٹ کی مدد سے پولیس نے عبدالقادر کو گرفتار کرلیا۔

پتہ چلا ہے عبدالقادر کسی نئے مقام پر جاتا اور لوگوں سے اپنا تعارف غیر شادی شدہ شخص کے طور پر کرواتا۔ پھر کسی طرح وہ کسی نہ کسی کو اپنے جال میں پھنسا کر شادی رچاتا اور کچھ دنوں بعد نقد ی اور زیورات کے ساتھ غائب ہوجاتا تھا۔ اس سے پہلے اس نے بی سی روڈ، کلاڈکا،اوجیاڈکا،وٹلا، پویاٹا بیل،کلّوراوی، بائی کٹے وغیرہ میںیہی ڈھونگ رچاتے الگ الگ لڑکیوں سے شادیاں کی تھیں۔بتایا جاتا ہے کہ اس کی سات بیویو ں میں سے پانچ بیویوں سے اس کو 11اولادیں ہوئی ہیں۔