نوجوان ووٹرس کو اپنا حق استعمال کرنے کی ترغیب دینے کے لئے سمندر کی لہروں پر ووٹر شناختی کارڈز کی تقسیم
کاروار 18؍مارچ(ایس او نیوز) الیکشن کے دوران اپنا حق رائے دہی استعمال کرنے کی ترغیب دینے کے لئے سرکاری طور پر بہت سارے منصوبے بنائے جاتے ہیں۔ اسی سلسلے کی ایک نئی ترکیب کے طور پرضلع انتظامیہ شمالی کینرا کی طرف سے سمندر کی لہروں پر تیرتے ہوئے ووٹر آئی ڈی تقسیم کرنے کی کارروائی کاروار کے دیوگڑھ جزیرے کے پاس سمندر میں انجام دی گئی۔
نئے ووٹرس کے طور پر فہرست میں شامل کیے گئے ضلع کے 4 ملینئم ووٹرس کو(جن کی پیدائش یکم جنوری 2000ہوئی تھی) رائے گڑھ کے پاس مفت میں اسکوبا ڈائیونگ کرواتے ہوئے وہیں پر ضلع کے ڈپٹی کمشنر ایس ایس نکول اور ضلع پنچایت سی ای او چندراشیکھرنے ان کے شناختی کارڈز ان کے سپر د کیے۔اس موقع پر بات کرتے ہوئے ڈی سی نے کہا کہ ضلع شمالی کینر امیں 11.43لاکھ ووٹرس موجود ہیں، جن میں 28%نوجوان ہیں۔لہٰذا نوجوانوں میں ووٹنگ کے سلسلے میں بیداری لانے کے لئے ملینئم ووٹر کے طور پر درج ہونے والے کاروار تعلقہ کے اکشئے ولاس گوویکر، سداشیو گڑھ کے پونم روی گجنیکر، بھٹکل تعلقہ کائیکنی کی دیکشا مُکُند مڈیوال اور آئیشوریا کاروار کو مفت اسکوبا ڈائیونگ کا موقع فراہم کیا گیا ہے۔اس نئے تجربے پر مذکورہ نوجوان ووٹرس نے نہایت مسرت کا اظہار کیا۔
ڈپٹی کمشنر نے اخبار نویسوں کو بتایا کہ ضلع کے کچھ مقامات سے سڑک ، بجلی اور پانی وغیرہ کی سہولت فراہم نہ ہونے پر ووٹنگ کا بائیکاٹ کرنے کا فیصلہ کیے جانے کی خبریں موصول ہوئی ہیں۔ متعلقہ تحصیلدار اور اسسٹنٹ کمشنرز ایسے مقامات پرپہنچ کر عوام کو سمجھانے کی کوشش کریں گے کہ ووٹنگ کا بائیکاٹ کرنے سے مسائل حل نہیں ہوتے، بلکہ انتخاب میں پوری طرح حصہ لے کر اچھے نمائندوں کو منتخب کرنے سے مسائل حل ہوتے ہیں۔
بتایا جاتا ہے کہ ووٹر لسٹ میں پہلی بار نام درج کروانے والے ضلع کے مختلف تعلقہ جات میں ملینئم ووٹرس کی تعداد : کاروار 4، انکولہ3، کمٹہ2، بھٹکل 2، یلاپور1، ہلیال 1 جملہ 13ہے۔