کاروار29؍مارچ (ایس او نیوز) کاروار میں واقع انڈین نیوی کے کدمبا نیول بیس کے افسران نے سماجی خدمات میں اپنی ذمہ داری اداکرتے ہوئے چیتّا کول میں موجود ایک سرکاری پرائمری اسکول کی تجدید و آرائش کا کام انجام دیا۔
ہرسال کے منصوبے کے مطابق کسی ایک اسکول کو ماڈل اسکول کے بطور تعمیر کرنے کی سمت میں قدم بڑھاتے ہوئے نیول افسران نے چیتّاکول کے اس خستہ حال اسکول کو نیا روپ دیا ہے۔ نیوی افسران، عملہ اوران کے اہل خانہ کی طرف سے تقریبا 2.9لاکھ روپے کا عطیہ فراہم کیا گیا ہے، جس سے اسکول چھت اورکمپاونڈ کو درست کرنے کے علاوہ رنگ و روغن ،پانی ٹینک، روشنی کے لئے ٹیوب لائٹس ، پنکھے اور دیگر سازوسامان فراہم کیاگیا ہے۔
نیوی کے ایڈمرل جنرل کے ،جی کمارنے اسکول کا دورہ کرنے کے بعد اخبارنویسوں سے خطاب کرتے ہوئے بتایا کہ اس اسکول میں خون عطیہ کیمپ منعقد کرنے کے بعدیہاں کی حالت سدھارنے کے سلسلے میں فیصلہ کیا گیا تھااور22 جنوری سے تجدید اور مرمت کا کام شروع کیا گیا تھا۔انہوں نے کہا کہ صرف دو مہینے کے عرصے میں نیوی کے افسران اور عملے نے خود ہی مرمت کا کام انجام دیا جو ہمارے لئے فخر کی بات ہے۔اس موقع پر ڈی ڈی پی آئی مسٹر پی کے پرکاش، بحریہ کے افسران اور عملے سے تعلق رکھنے والی شخصیات کے علاوہ اسکول کے اساتذہ اور طلباء موجود تھے۔