کاروار/بھٹکل:12/ جنوری (ایس اؤنیوز)بھٹکل تعلقہ شرالی گرا م پنچایت حدود کے شرالی بازار سےمتصل گزرنے والی قومی شاہراہ کی مناسب طورپر توسیع کرنے کا مطالبہ لے کر شرالی گرام پنچایت صدر وینکٹیش این نائک کی قیادت میں مقامی عوام نے جمعرات کو ضلع ڈپٹی کمشنر ایس ایس نکول سے ملاقات کرتے ہوئے درخواست سونپی۔

شرالی گرام پنچایت کے شرالی بازار کے 700میٹر حدود میں قومی شاہراہ 66کی توسیع 45میٹر کے بجائے 30میٹر تک محدود کی گئی ہے، شاہراہ کی توسیع 45میٹر کی مانگ لے کر تعلقہ اسسٹنٹ کمشنرکو کئی بار خطوط لکھتے ہوئے توجہ دلائی گئی ،اس کے باوجود ضلع انتطامیہ غیر سائنٹفک طورپر توسیع کو 30میٹر تک محدود کیا جانا افسوس ناک ہے، گرام پنچایت حدود میں1700سے زائد آبادی بستی ہے، شاہراہ کی توسیع صرف 30میٹر تک روک دینے سے آبادی کی چہل پہل کے لئے کافی مسائل پیدا ہونا یقینی ہے۔

میمورنڈم میں شرالی گرام پنچایت کے ممبران اور عوام کے مطالبہ کے مطابق فوری طورپر گرام پنچایت حدود میں شاہراہ کی توسیع 30میٹر کے بجائے 45میٹر کرنے پر زور دیا گیا ہے۔ اس موقع پر سنیتا ہیرورکر، ایشور موگیر، یوگیش موگیر، بھاسکر دئیمنے ، جنا دیواڑیگا، پاروتی نائک، لکشمی نائک سمیت کئی لوگ موجود تھے۔