کاروار:16/جون (ایس اؤنیوز)متعدی بیماریوں کے ازالے میں عوامی نمائندوں کا تعاون بہت ضروری ہے، محکمہ صحت عامہ کے ساتھ عوامی نمائندے ضلع کو ملیریا پاک ضلع بنانے میں اپنا بھرپور ساتھ دینے کی ضلع پنچایت ایگزکیٹیو آفیسر چندرشیکھر نایک نے اپیل کی۔

وہ یہاں جمعہ کو محکمہ صحت عامہ کے ہال میں ضلعی انتظامیہ ، ضلع پنچایت ، تعلقہ پنچایت ، محکمہ نشرواشاعت اور عوامی رابطہ عامہ کے اشتراک سے ملیریا ازالہ کے متعلق عوامی نمائندوں کے معلوماتی کیمپ اورمباحثہ پروگرام کا افتتاح کرنے کے بعد خظاب کررہے تھے۔ انہوں نے کہاکہ متعدی بیماریوں کی روک تھام کے لئے معمولی جانکاری بھی ہے تو ایسی بیماریوں کا خاتمہ ممکن ہے۔ کیمپ سے استفادہ کرتے ہوئے مچھروں سے پیدا ہونے والی بیماریوں کے ازالے میں عوامی نمائندوں تعاون کی اپیل کی۔

پروگرام کی صدارت کرتے ہوئے کاروار بلدیہ کے صدر گنپتی نائک نے کہاکہ ملیریا ازالہ کیمپ کے انعقاد سے عوامی نمائندوں کو عوام میں بیداری لانا ممکن ہوگا۔ عوامی نمائندوں کی ذمہ داری بنتی ہے کہ وہ محکمہ کےساتھ تعاون کرتے ہوئے ملیریا کے ازالے کے لئے کام کریں۔ بلدیہ کی نائب صدر لیلابائی تھانیکر نے افتتاحی کلمات میں کیمپ سے حاصل کردہ جانکاری کو عوام میں پھیلانےکی اپیل کی۔ کیمپ میں انسداد بیماری افسر کیپٹن رمیش راؤ نے ملیریا کے نقوش، نشانات ، روک تھام کے لئے پیشگی اقدامات پر روشنی ڈالتے ہوئے تفصیلی جانکاری دی۔ ضلع صحت عامہ کے تعلیمی افسر ڈاکٹر ایس جی نائک نے نظامت کی۔ ضلعی صحت عامہ کے افسر ونود بھوتی ، کاروار تعلقہ صحت عامہ کے افسر ڈاکٹر سورج نائک ڈائس پر موجود تھے۔ بلدیہ ، تعلقہ پنچایت کے ممبران کیمپ میں شریک تھے۔