کاروار میں سڑکوں پر آوارہ مویشیوں کی بھرمار۔ حادثات میں اضافے کا سبب
کاروار 7؍اگست (ایس او نیوز) شہر میں سڑک پر یونہی چھوڑے گئے مویشیوں کی تعداد دن بدن بڑھتی جارہی ہے اور اس وجہ سے یہاں ہونے والے سڑک حادثات میں بھی اضافہ دیکھنے کو مل رہا ہے۔
رات کے وقت شہر کے سویتا سرکل، پھول بازار، گرین اسٹریٹ، ایم جی روڈ، بانڈی شیٹی روڈ، نندن گدا روڈ جیسے علاقوں میں آوارہ مویشیوں کا ہجوم لگ جاتا ہے ۔ یہاں وہاں بیچ سڑک پر سوئے پڑے جانوروں کی وجہ سے موٹر سواریوں کو بہت زیادہ دقت کاسامنا کرناپڑتا ہے۔ اور اکثر آدھی رات کو یا ذرا اندھیرے علاقے میں دور سے یہ جانور نظر نہ آنے کی وجہ سے حادثات واقع ہورہے ہیں۔کچھ لوگوں کا کہنا ہے کہ دودھ کے لئے گائیں پالنے والے لوگ اپنے گھر میں جانوروں کو باندھنے کا انتظام نہ ہونے کی وجہ سے انہیں یونہی آوارہ گرد ی کرنے کے لئے سڑکوں پر چھوڑ دیتے ہیں۔اس کے علاوہ سڑک کنارے پائے جانے والے کچرے کے ڈبوں اور ڈھیر کی وجہ سے بھی بعض جانور اپنے مالکین کے گھر نہیں جاتے بلکہ ادھر ادھر گھوم پھر کر کچرا کھاتے اور پھر سڑک پر ہی رات گزاری کرلیتے ہیں۔اس کا نتیجہ یہ ہوا ہے کہ کاروار شہر کی سڑکیں مویشیوں کا باڑہ بن کر رہ گئی ہیں۔
عوام کا الزام ہے کہ شہر میں آوارہ مویشیوں کی تعداد روزبروز بڑھتی جارہی ہے، لیکن شہر کی میونسپل کاونسل کوئی بھی قدم اٹھائے بغیر اس طرف سے آنکھیں بند کرکے بیٹھی ہوئی ہے۔کچھ لوگوں کو یہ کہتے ہوئے بھی سنا گیا کہ آوارہ کتوں سے نجات دلانے میں ناکام میونسپل کاونسل کے پاس آوارہ مویشیوں کا مسئلہ حل کرنے کی طاقت کہاں سے آئے گی۔کہاجاتا ہے کہ میونسپل کاونسل کی طرف سے ان جانوروں کو اپنے قبضے میں لینے یا پھر انہیں پکڑ کر گؤ شالاؤں میں بھیج دینے کی اسکیم بھی صرف کاغذی منصوبہ بن کر رہ گئی ہے۔
