کاروار:20؍نومبر (ایس او نیوز) ہندوستانی الیکشن کمیشن کی ہدایات کے مطابق 23،24اور 25نومبر کو اترکنڑا ضلع میں ووٹرس کے ناموں کے اندراج کے لئے خصوصی مہم کا اہتمام کیا گیا ہے، اس بات کی اطلاع ڈپٹی کمشنر ایس ایس نکول نے پریس کانفرنس میں دی ہے۔

 منگل کو ڈی سی دفتر ہال میں اخبار نویسوں سے گفتگو کرتے ہوئے ڈپٹی کمشنر نے  بتایا کہ جن کی عمر 18برس ہوچکی ہے، ان کا نام  نئے رائے دہندگان کی فہرست میں درج کیا جائے گا۔مہم کے دوران  نام، پتہ میں تبدیلی ، دیگر مقامات کو منتقلی کے متعلق بھی عرضیاں قبول کی جائیں گی۔

ڈپٹی کمشنر نے بتایا کہ 23،24،25نومبر کو بوتھ آفیسران آپ کے متعلقہ بوتھ سنٹرس پر صبح 9بجے سے شام 6بجے تک موجود رہتے ہوئے عوام سے عرضیاں قبول کرتے ہوئے اپنی خدمات انجام دیں گے۔ضلعی انتظامیہ کی جانب سے  معذوررائے دہندگا ن کو بھی ان کے حق کا استعمال کرنے کےلئے بہتر سہولیات فراہم کی جائیں گی۔ انہیں پولنگ بوتھ تک لے آنے اور لے جانے کے لئے سواریوں کا انتظام کیا جائے گا۔انہوں نے واضح کیا کہ  اس سلسلے میں آفیسران کو متعلقہ علاقوں میں معذورین کے لئے بیداری پروگرام منعقد کرنے کی ہدایات جاری  کی گئی ہیں۔