کاروار:20/ جنوری (ایس اؤنیوز)سی برڈ منصوبے کےمتاثرین میں سرکارکی طرف سے تقسیم کی جارہی ہرجانہ امداد کو کسی مفید کام میں استعمال کرتےہوئے زندگی میں استحکام لانے کی ضلع سول منصف اور ضلع قانونی بورڈ خدمات کے صدر وٹھل دھارواڑکر نے صلاح دی ۔

وہ یہاں ضلع سول عدالت کے صحن میں ضلع انتظامیہ ، ضلع قانونی بورڈ اور ضلع وکلاء تنظیم کے اشتراک سے منعقدہ قانون اور خصوصی لوک عدالت کے ذریعے سی برڈ متاثرین میں ہرجانہ چک تقسیم کاری پروگرام کا افتتاح کرنے کے بعد خطاب کررہے تھے۔ سینئر سول عدالت اور چیف جج شیوکمار بی نے خطاب کرتے ہوئے کہا کہ مرکزی حکومت نے متاثرین کہنے کے بجائے مستفیدین کالفظ استعمال کیا ہے، ہرمہینہ مرحلہ وار اہل مستفیدین میں معاوضہ چک ادا کئےجائیں گے۔ آج دوسرے مرحلے کو جاری کیاگیا ہے، مستفیدین تعاون کرتے ہوئے اپنے معاوضہ کی رقم حاصل کرسکتے ہیں۔

کاروار تعلقہ میں کل 258مستفیدین کو منتخب کرتے ہوئے ان میں 10،18،59،930روپئے تقسیم کئے جارہے ہیں۔ اسی طرح انکولہ تعلقہ میں کل 11.38کروڑ روپیوں کو تقسیم کیا جارہاہے۔ پروگرام میں ایڈیشنل سنئیر سول عدالت کے جج امرناتھ کے کے ، کاروار جے ایم ایف سی سول جج مہیش چندرکانت، کاروار جے ایم ایف سی ایڈیشنل جج وویک گراموپادیائے، سنئیر سول جج اور ضلع قانونی بورڈ کےممبر سکریٹری ٹی گوندیا ، کاروار بلدیہ کے کمشنر اور زمین حصولیابی کے خصوصی افسر ایس یوگیشور ، وکلاء تنظیم کے صدر ایس کے پوار اور سکریٹری مہیش ہری کانت وغیرہ موجود تھے۔