کاروار:12/جون (ایس اؤنیوز)برسات کے موسم میں اچانک پیش آنے والےسیلاب، طغیانی اور دیگر آفاقی حادثات کے دوران ضروری تحفظاتی اقدامات کرنے کے لئے ضلع کے منتخب ولیج اکاؤنٹنٹس کو ضلع انتظامیہ کی طرف سے 4روزہ آفاقی حادثات تحفظاتی تربیتی ورکشاپ کا انعقاد کیا گیا جس میں ضلع کے 80ولیج اکاونٹنٹس کو تربیت دئیے جانے کی جانکاری محکمہ کی طرف سے جاری پریس ریلیز میں دی گئی ہے۔

ورکشاپ کا آغاز جمعہ کو ہوا، منتخب نمائندوں کو 2زمروں میں تقسیم کرتے ہوئے انہیں تیراکی، چھوٹی کشتی میں پتوار چلانا، رافٹنگ کے ذریعے کس طرح حفاظتی تدابیر اختیار کی جاسکتی ہیں ا س کی تربیت دی گئی ۔ اسی طرح خود کی حفاظت، ابتدائی علاج(فسٹ ائیڈ)،موٹر بوٹ کی ڈرائیونگ ، بھرپور بہتی ندی کو پار کرنا (فیری کراسنگ)، رسی کے ذریعے حفاظتی تدابیر ، مشینوں اور دیگر حفاظتی اشیاء کے استعمال کی تربیت دی گئی ۔ اترکنڑا ضلع انتظامیہ کی طرف سے ایسے تربیتی ورکشاپ گذشتہ تین سالوں سے منعقد کئے جارہے ہیں۔ پہلے سال 60،دوسرے سال 80اور امسال 80محکمہ تحصیل کے عملے کو تربیت دی گئی۔ موسم باراں میں ضلع کے کئی ایک دیہاتوں میں مصنوعی سیلاب کی صورت پیدا ہوتی رہتی ہے ، ایسے موقعوں کے دوران عملہ وہاں پہنچ کر حفاظتی تدابیر کو اختیار کرکے عوام کو بحفاظت بچالانے میں مدد کرنے کے لئے یہ تربیتی کیمپ ممد و معاون ہوتے ہیں۔ ریاست میں صرف ہماری ضلع انتظامیہ کی طر ف سے محکمہ تحصیل کے عملے کو ایسی تربیت دئیے جانے کی جانکاری ایڈیشنل ڈی سی ایچ، پرسنا نے دی۔

منتخب نمائندوں کو تربیت دینے کے لئے کالی ندی کے کنارے کو منتخب کیا گیا تھا جو تربیت ہی بہت ہی موزوں اور مناسب مقام ہے۔ لگاتار چار دن وہاں مختلف طریقوں کو اپنا کر ان کی تربیت کی گئی تاکہ ان میں خود اعتماد ی اور لیڈر شپ کی خصوصیات پیدا ہوں۔ اس موقع پر کئی ایک تربیت پانے والے ولیج اکاونٹنٹس نے بتایا کہ ورکشاپ سے انہیں مختلف تربیتی پہلوؤں پر عبور حاصل ہوا ہے ، خود اعتمادی میں اضافہ بھی ہوا۔ چندرکانت ہری کنتر، ونود، جئے رام ہری کنتر، جگدیش ہری کنتر نے تربیتی کورس میں رہنمائی کی۔