انکولہ میں ہوئی مشتبہ موت کا معمہ حل ؛ پولس نے کیا قتل کے 2 ملزمین کو گرفتار
کاروار22؍مارچ(ایس اونیوز)انکولہ کے سنجیوا دتّا باناولیکر (28سال)کی مشتبہ حالت میں ہوئی موت کے معمہ کو پولیس نے حل کرلیا ہے اور اس قتل کے الزام میں دو ملزمین کو گرفتار کرلیا ہے۔
گرفتار شدہ ملزمین کی شناخت ہارواڈ کے مکین ویویکانند درگیا کھاروی (21سال) کی حیثیت سے کی گئی ہے، جبکہ اس قتل کا دوسرا ملزم ایک کم عمر لڑکا ہے جسے بیلے کیری سے گرفتار کرلیا گیا ہے۔ ذرائع سے ملی اطلاع کے مطابق گرفتار ملزمین کے پاس سے قتل میں استعمال کی گئی رسّی، موٹر بائک اور موبائل فون وغیرہ ضبط کیے گئے ہیں۔پولیس کے بیان کے مطابق پرانی دشمنی کی وجہ سے سنجیوا کو مو ت کے گھاٹ اتاردیا گیا تھا۔
خیال رہے کہ مارچ 15تاریخ کو ہارواڈ کے ساحلی کنارے میں سنجیوا کی لاش برآمد ہوئی تھی۔مقامی افراد نے میمورنڈم دیتے ہوئے تحصیلدار سے مطالبہ کیا تھا کہ اسے ایک غیر فطری موت سمجھنے کے بجائے قتل کے زاویے سے تحقیقات کروائی جائے۔
انکولہ پولیس اسٹیشن میں کیس درج کرنے کے بعد تحقیقات کے دوران اس قتل کا راز کھلا اور مذکورہ ملزمین کو گرفتار کرلیا گیا۔جب ملزمین کو جائے واردات پر پنچ نامہ کرنے کے لئے لایا گیا تو مقامی لوگوں نے ملزمین کو ان کے حوالے کرنے کا مطالبہ کرتے ہوئے پولیس گاڑی کا گھیراؤ کیاجس سے تھوڑی دیر کے لئے حالات کشیدہ ہوگئے تھے۔ مگر بعد پولیس نے وہاں موجود ہجوم کو سمجھا بجھا کر منتشر کردیا۔
