کاراور 9/دسمبر (ایس او نیوز)ریاستی فورتھ فائنانس کمیشن کے رکن ڈاکٹر ایچ ششی دھر نے بتایا ہے کہ آئندہ دنوں میں بلدی اداروں کو ان کی کارکردگی کی بنیاد پر فنڈ فراہم کیے جانے کے امکانات زیادہ ہیں۔

    مسٹر ششی دھرنے یہ بات یہاں ضلع پنچایت کے میٹنگ ہال میں ضلع بھر کے میونسپالٹی اور پنچایتی اداروں کے نمائندوں کے ساتھ جائزاتی نشست میں کہی ہے۔انہوں نے کہا کہ پنچایت راج کے تحت آنے والے تمام اداروں کو اپنا حساب و کتاب صاف ستھرا رکھنا چاہیے۔ گرام پنچایت سطح پر ٹیکس کی وصولیابی کو صحیح طور پر انجام دینے کے علاوہ ٹیکس کی شرح پر نظر ثانی کا کام بھی وقفے وقفے سے ہونا چاہیے۔

    اس موقع پربلدی اداروں کے ذمہ داروں نے سڑک، بجلی، پانی اور دیگر بنیادی سہولتوں کے تعلق سے اپنے اپنے علاقوں میں درپیش مسائل کا ذکر کیااور سرکارکی طرف سے زیادہ سے زیادہ فنڈ فراہم کرنے کی مانگ رکھی۔تعلقہ پنچایت کے صدور نے اپنی طرف سے میمورنڈم دیا جس میں مطالبہ کیا گیا تھا کہ تعلقہ صدور کو بھی ماہانہ اعزازی معاوضہ دیا جانا چاہیے اس کے علاوہ تعلقہ پنچایتوں کے لئے فنڈ میں اضافہ ہونا چاہیے۔

اس میٹنگ کے دوران ضلع پنچایت صدر جئے شری موگیر،نائب صدر سنتوش رینکے،سی ای او مسٹر ایل چندر شیکھر نائک،فائنانس کمیشن کے رکن امرناتھ وغیرہ موجود تھے۔