ہوناور میں منکال وئیدیا اور اننت کمار ہیگڈے کے درمیان جھڑپ: سرکٹ ہاؤس میں معمولی کمرے کو لےکر لفظی جھڑپ
ہوناور 26/فروری (ایس او نیوز) سرکٹ ہاؤس میں ریزرو کردہ کمرہ نہ ملنے پر اترکینرا کے رکن پارلیمان اننت کمار ہیگڈے اور بھٹکل کے رکن اسمبلی منکال وئیدیا کے درمیان لفظی جھڑپ ہونے کی خبر موصول ہوئی ہے۔
بتایا جارہاہے کہ سنیچر کی صبح کسی پروگرام میں شرکت کے لئے ایم پی آننت کمار ہیگڈے سرکٹ ہاؤس پہنچے ، جس کمرے میں ان کا قیام تھا وہاں پہلے سے بھٹکل کے رکن اسمبلی منکال وئیدیا ، منکی بلاک کانگریس صدر چندرشیکھر گوڈا کے ساتھ مقیم تھے۔ ایم پی جب کمرے کے اندر پہنچے تو وہاں رکن اسمبلی اور دیگر لوگوں کودیکھ کر ایم پی کے حمایتیوں نے سوچا کہ چلئے دوسرا کمرہ دیکھ لیں۔ لیکن ایم پی اننت کمار ہیگڈے نے اسی کمرے کی مانگ کرتے ہوئے رکن اسمبلی کے کمرے میں موجود رہنے کے بائوجود اندر چلے گئے۔ اس وقت فطری اندازمیں مسکراتے ہوئے رکن اسمبلی منکال وئیدیا نے ان کا استقبال کیا۔ لیکن ایم پی حسب معمول اپنا رخ تبدیل کرتے ہوئے رکن اسمبلی سے بلند آواز میں کہاکہ تم اس کمرے میں کیا کررہے ہو ؟ منکال نے جب بات کرنے کی کوشش کی تو آننت کمار ہیگڈے نے ترش لہجے میں کہا کہ یہ کمرہ خالی کرو، مجھے تم سے کوئی دوسری بات نہیں کرنی ہے۔ ایم پی کے تیور کو دیکھتے ہوئے رکن اسمبلی منکال وئیدیا کمرے سے باہر چلے گئے۔
واقعے کے فوری بعد باہر لوگوں سے یہ سنا گیا کہ ایک عوامی نمائندہ ہوکر دوسرے عوامی نمائندے سے اس طرح کا رویہ اپنانا بالکل ٹھیک نہیں ہے۔ عوام نے ایک ایم پی کے ایک معمولی کمرے کو لے کر رکن اسمبلی کے ساتھ غلط سلوک کرنے پر سخت اعتراض کیاہے۔
اس بات کا پتہ نہیں چلا کہ ایم پی اور ایم ایل اے کے درمیان کمرے کے اندر مزید کیا جھگڑا ہوا۔ لوگوں کا کہنا ہے کہ صرف اتنی سی بات پر ایم ایل اے باہر نہیں جاسکتے، کافی لفظی جھڑپیں ہوئی ہوں گی، لیکن کیا کیا باتیں ہوئیں معلو م نہیں ہوا۔ رکن اسمبلی منکال وئیدیا سے رابطہ کرنے پر انہوں نے اس واقعے کی تصدیق کی ہے۔