کاروار میں مہیلا پولیس اسٹیشن قائم ہوئے 5مہینے گزرگئے،ایک بھی معاملہ درج نہیں ہوا
کاروار 22؍اپریل (ایس او نیوز)کاروار میں ضلع شمالی کینرا کاخواتین کے لئے مخصوص پہلا "مہیلا پولیس اسٹیشن"قائم ہوئے 5مہینے گزرگئے، لیکن رپورٹ کے مطابق اب تک اس پولیس اسٹیشن میں ایک معاملہ بھی درج نہیں ہوا ہے۔
خواتین پر ہونے والے مظالم کے خلاف انہیں انصاف دلانے کی نیت سے شہر میں واقع ٹریفک پولیس اسٹیشن میں ہی خواتین کے مخصوص اسٹیشن قائم کیا گیا ہے۔مگر عورتوں کے خصوصی معاملات آج بھی پرانے طرز پرعام پولیس اسٹیشن میں ہی درج کیے جارہے ہیں۔ ایک بات یہ بھی نوٹ کرنے کی ہے کہ اس پولیس اسٹیشن کا عملہ ایک خاتون پی ایس آئی، دو خواتین اے ایس آئی اور 12خواتین اسٹاف پر مشتمل ہے ، لیکن ابھی تک خاتون سب انسپکٹر کا تقرر یہاں نہیں کیا گیا ہے۔ اس طرح یہ ایک ایسا پولیس اسٹیشن ہے جس کے پاس پانچ مہینوں سے کوئی کام نہیں ہے۔
ضلع ایس پی نے بتایا کہ اس ضمن میں کارروائی ہورہی ہے اور جلد ہی اس پولیس اسٹیشن میں خاتون پی ایس آئی کو تعینات کیا جائے گا۔ایس پی نے مزید یہ بھی کہا کہ ضلع کے دوسرے مقامات سے خواتین سے متعلقہ معاملات اس پولیس اسٹیشن کو منتقل کرنا بھی عملاً دشوار ہے ، کیونکہ اس سے شکایت کنندہ کو ضلع کے دوردراز مقامات سے کاروار آنے جانے میں بڑی دقت ہوسکتی ہے۔
