کاروار:13/ستمبر (ایس اؤنیوز)قانونی نظام کی حفاظت،پاسداری اور عمل آوری میں مقامی تحصیلدار کا اہم کردار ہونے کا سنئیر سول منصف اور ضلع قانونی خدمات بورڈ کے ممبرسکریٹری منصف ٹی گوندیا نے خیال ظاہر کیا۔
ضلع انتظامیہ، ضلع قانونی خدمات بورڈ اور ضلع وکلاء تنظیم کے اشتراک سے منعقدہ محکمہ تحصیل کے افسران میں قانونی بیداری ورکشاپ کا افتتاح کرنےکے بعد منصف خطاب کررہے تھے۔ انہوں نے کہاکہ قانون کا اصل مقصد سماج میں امن وامان اور اعتماد کی پرسکون فضا کو برقرار رکھنا ، اس کی حفاظت کرنا ہے۔ اس پس منظر میں مقامی تحصیلدار کی اہم ذمہ داری بنتی ہے کہ وہ سماج میں ہرحال میں امن کو برقرار رکھنے کے لئے اپنا کردار ادا کرے۔ منصف گوندیا نے حالات کے بگاڑ اور بدامنی پیدا ہونے نہ دینے کی بات کہتے ہوئے کہاکہ محکمہ تحصیل کے افسران جب کبھی سماج میں بدامنی پھیلانے کی کوشش کی جاتی ہے اس دوران ان کی قوت فیصلہ بیدار ہونی چاہئے اور ان کے ذریعے لئے جانے والے فیصلوں پر ہی سماج کی بہتری کا انحصار ہے۔ اگر افسران کے فیصلے تعین کردہ حدود، واضح اور تعمیر ی ہوتے ہیں تو ان کاسماج پر اثر ہوتاہے اور اوپر کی عدالتوں میں ان کے فیصلے کو منظوری ملتی ہے، اگر ایسا نہیں تو پھر آپ کی محنت بیکار اور ناکام ہوجائیں گے۔ اسی لئے تحصیل افسران خاص کر تحصیلداروں کے حکم اور فیصلے قطعی اور واضح ،منصفانہ ہوتے ہیں تو عدالتیں بھی ان کو برقرار رکھتی ہیں اور اس نہج پر فیصلے کریں کہ اس کا کوئی حل نکلے۔
پروگرام کی صدارت کئے ڈپٹی کمشنر ایس ایس نکول نے کہا کہ تعلقہ تحصیلدار ، معاون تحصیلدار کی طرف سے لئے جانے والے فیصلوں کو نافذ کرنے میں دفتر کے نگراں کاروں کا رول بھی اہم ہوتاہے ، ایسے معاملات میں غفلت نہ برتتے ہوئے فوری طورپر اس کی فائل تیار کرکے ارسال کریں۔ اور متعلقہ معاملات کو لے کر پولس یا عوام کی طرف سے دی گئی درخواستوں کی نازکی اور سنجیدگی کو دیکھتے ہوئے فوری طورپر مقامی تحصیلدار کو جانکاری دیں اور ضرورت پڑنے پر تحصیلدار ہی نوٹس جاری کرنے کی بات کہی۔
کرائم دفعہ 107،109اور 110کے متعلق مقالہ پیش کرتے ہوئے سنئیر وکیل کے ٹی گوڈا نے کسی بھی معاملے میں عہدے پر فائز تحصیلدار کا فیصلہ بہت اہم ہوتاہے ، مگر ہم دیکھتے ہیں کہ حالیہ دنوں میں تحصیلداروں کی طرف سے لئے جانے والے فیصلوں میں وضاحت نہیں ہوتی ہے جس کی وجہ سے کئی معاملات عدالتوں میں ناکام ہوجاتے ہیں۔ اور ایک سنئیر وکیل آر وی بھٹ نے زمین ٹیکس قانون کے متعلق تفصیل بیان کی۔ ضلع وکلاء تنظیم کے صدر اُدئیے کمار این نائک اور اپر ڈی سی ، ایچ پرسنا موجود تھے۔