کاروار 15؍دسمبر (ایس او نیوز) کاروار رکن اسمبلی روپالی ایس نائک کی قیادت میں 22اور23دسمبر کو ایک زبردست روزگار میلہ منعقد کیا جائے گا، جس میں ملک کے مختلف علاقوں سے 106کمپنیوں کے نمائندے حصہ لیں گے۔توقع کی جارہی ہے کہ تقریباً5300بے روزگار نوجوان اس میلے سے فائدہ اٹھائیں گے ۔

بتایا جاتا ہے کہ میلے میں انٹرویو کے بعد جن امیدواروں کا انتخاب کیا جائے گا ان کو کمپنی کی طرف سے موقع پر ہی آفر لیٹر اور تقرری کے کاغذات سونپے جائیں گے۔ ایس ایس ایل سی سے لے کرآئی ٹی آئی ڈپلوما ، نرسنگ، انجینئرنگ اور دیگر شعبہ جات میں ڈگریاں رکھنے والے تمام بے روزگار نوجوان اس میلے سے استفادہ کرسکتے ہیں۔معلوم ہوا ہے کہ اس میلے میں انفوسیس، ایکسینچر، ٹی سی ایس، ہنی بیل، کینرا بینک، ویپرو، ریلائنس، آدتیہ برلا، ایچ ڈی ایف سی، ایل اینڈ ٹی، ایس بی آئی، اوڈافون، فورٹیس گروپ جیسی کمپنیاں شامل رہیں گی۔