کاروار میں ایک لاکھ سے زائد مالیت کی شراب ضبط؛ ڈرائیور کار چھوڑ کر فرار
کاروار:23/مارچ(ایس اؤ نیوز)مصدقہ خبر پر کارروائی کرتےہوئے ایکسائز محکمہ کے افسران نے ایک کار کے ذریعے غیر قانونی طورپر سپلائی کررہے 1لاکھ 16ہزارروپیوں کی قیمت والی گوا شراب کو ضبط کرلیا ہے۔ یہ کاروائی کاروار کے ماجالی سرحد پر کی گئی ۔ محکمہ ایکسائز نے شراب کے ساتھ ساتھ شراب لے جانے والی فورڈ آئکان کار اورایک موبائیل بھی اپنے قبضے میں کرلیا ہے۔
ایکسائز معاون کمشنر موشاما جوئس نے بتایا کہ انہیں مصدقہ اطلاع موصول ہوئی تھی کہ متعلقہ کار پر گوا سے غیر قانونی شراب لے جائی جارہی ہے۔ اطلاع ملتے ہی انہوں نے ایکسائز انسپکٹر سورنا بی نائک اور ٹیم کے ساتھ ماجالی کے گرجا بائی انجنئیرنگ کالج کی قومی شاہراہ کراس پر آئکان کار کو روک دیا اور 1،16،000 قیمت کی گوا شراب کو ضبط کرلیا۔ بتایا گیا ہے کہ کار کو روکتے ہی ڈرائیوراپنا موبائیل اور 7 لاکھ مالیت کی آئکان کار چھوڑ کر فرار ہوگیا۔ مزید چھان بین جاری ہے۔