کاروار میں موسلادھار بارش ؛ پانی گھروں کے اندر گھس گیا: خوف زدہ عوام چھتوں پر رات گزارنے پر مجبور
کاروار:16/ اکتوبر (ایس اؤنیوز)گذشتہ دو دنوں سے برس رہی موسلا دھار بارش سے سنیچر کی رات شرواڑ گرام پنچایت حدود کے نارگیری موضع کے کچھ مکانات میں پانی گھس جانے سے مکینوں کو کافی پریشانی کا سامنا کرنا پڑا۔
برسوں سے بارش ہوتی رہتی ہے مگر کبھی نارگیر ی دیہات میں پانی جمع نہیں ہوتاتھا لیکن سنیچر کی رات برسی موسلا دھار بارش سےپانی اچانک گھروں میں گھسنا شروع ہوا۔ مکین گھروں میں گھٹنے تک پانی بھرنے سے پریشان ہوکر اپنی چھتوں اور ٹیرس پر چڑھ گئے۔ گھرمیں موجود اناج، ضروری اشیاء ، کپڑے وغیرہ پانی میں بہہ گئے، گھر وں میں گندگی اور کیچڑ بھرگیا۔ پانی کی سطح چڑھنےلگی تو لوگ خوف زدہ ہوکر ضلع پنچایت ممبر چئترا کوٹھارکر کو اطلاع دی۔ انہوں نے ایڈیشنل ڈپٹی کمشنر سے رابطہ کرتےہوئے نارگیری کےمسئلے کی جانکاری دے کر ضروری اقدامات کرنے کی مانگ کی۔
اطلاع پاتے ہی ایڈیشنل ڈی سی پرسنا ایچ افسران کو جائے وقوع پر بھیجا، رات 30-11بجے تحصیلدار جی این نائک ،نائب تحصیلدار پرشورام نائیک ،ولیج اکاؤنٹنٹ ونود کمار اور کوٹریش نے عوام کا تعاون کرتے ہوئے جمع شدہ پانی کو راستہ دینے کاکام کیا۔ اس موقع پر کنر گرام پنچایت صدر سریندر کوٹھارکر بھی موجود تھے۔
