کاروار:6/ستمبر(ایس اؤ نیوز) کل بدھ کو بحرہ عرب میں کاروار ساحل سے 6کلومیٹر دور  انجدیو جزیرے کے پاس مچھلیوں کا شکار کرکے واپس لوٹنے کے دوران بوٹ کو آگ لگ گئی تھی جس کے تعلق سے بتایا جارہا تھا کہ سبھی 20 ماہی گیروں کو بحفاظت نکالا گیا ہے البتہ سات  ماہی گیروں کو شدید زخمی حالت میں اسپتال میں داخل کیا گیا ہے، اس تعلق سے آج جمعرات صبح جب جھلسی حالت میں بوٹ کو کنارے لایا گیا تو حیرت انگیز طور پر بوٹ پر سے ایک ماہی گیر کی نعش برآمد ہوئی ہے۔ 

اطلاع کے مطابق نعش  بوٹ کے انجن  کے قریب جھلسی حالت میں پڑی ہوئی پائی گئی ہے۔ جس کی شناخت  جھارکھنڈ کے رہائشی  امیت کے طور پر کی  گئی ہے۔

وامن ہری کنتر کی ’جل پدم ‘ نامی بوٹ کل سمندر میں مچھلیوں کے شکار کے بعد ساحل کی طرف لوٹ رہی تھی کہ  بوٹ کے انجن کی بیٹری میں دھماکہ ہوگیا، جس کے نتیجے میں بوٹ آگ کی لپیٹ میں آگئی تھی۔بوٹ میں موجود قریب بیس ماہی گیروں کو قریب سے گذرنے والی کیرالہ  کی ایک  بوٹ پر موجود ماہی گیروں نے بچالیا تھا، بعض لوگ سمندر میں کود کر بھی اپنی جان بچانے میں کامیاب ہوگئے تھے۔

بتایا گیا ہے کہ حادثے میں سات ماہی گیرآگ  میں پھنس جانے سے زخمی ہوگئے تھے۔ جن کی شناخت انکولہ کے دیپک  اور  وجئے ، چھتیس گڑھ کے لکشمن ، راجیشور،راہول، سلومن  اور پریم پرکاش کی حیثیت سے کی  گئی ہے۔حادثہ میں  بوٹ مالک کو لاکھوں روپیوں کا نقصان ہواہے۔

کاروار ٹائون پولس تھانہ  میں کیس درج کیا گیا ہے۔