محکمہ آبکاری کے افسران پر حملہ۔ پولیس نے شروع کی ماجالی میں ملزمین کی تلاشی مہم
کاروار 24؍فروری (ایس او نیوز) گوا سے غیر قانونی طور پر شراب کی اسمگلنگ روکنے والے محکمہ آبکاری کے افسران پر جن تین ملزمین نے حملہ کیا تھا اور ان کی حمایت میں ہلّہ مچانے والے 30ملزمین کو گرفتار کرنے کے لئے پولیس نے ماجالی میں تلاشی مہم چلائی۔
خیال رہے کہ 16فروری کوسمندر کے راستے کشتیوں کے ۲ کشتیوں کے ذریعے گوا سے غیر قانونی طور پر شراب اسمگل کی جارہی تھی۔اس وقت محکمہ آبکاری کے افسران نے چھاپہ ماری کرتے ہوئے شراب سے بھرے ۲ تھیلے ضبط کیے تھے۔ اسی وقت بائک پر شرا ب کرنے والے ایک ملزم کو بھی دبوچ لیا تھا۔ اس وقت بہت سارے لوگ جمع ہوکر محکمہ آبکاری کے افسران اور عملے پر حملہ کرنے کے لئے آگے بڑھنے کے ساتھ ضبط کی گئی شراب کے تھیلے چھین کر فرار ہوگئے تھے۔ اس ہنگامے کی ویڈیو ریکارڈنگ کرنے والے محکمہ آبکاری کے افسر کا موبائل فون بھی چھین لیا گیاتھا۔
اس تعلق سے محکمہ آبکاری کی انسپکٹر سوورنا نائک نے تین افراد پر حملہ آور ہونے کا الزام لگاتے ہوئے چیتا کول پولیس اسٹیشن میں شکایت درج کی تھی۔ پولیس نے سرکاری افسران پر فرائض کی ادائیگی کے دوران رکاوٹ پیدا کرنے ، سرکاری افسران پر حملہ کرنے اور ضبط کی گئی اشیاء چراکر فرار ہونے کے الزامات کے تحت کیس درج کرلیا تھا۔ جمعہ کے ڈی وائی ایس پی شنکر ماریہال کی قیادت میں 50سے زیادہ پولیس افسران اور عملے نے محکمہ آبکاری ماجالی کے گابیت واڈا علاقے میں ملزموں کو گرفتار کرنے کی مہم شروع کی اور مشکوک گھروں کے اندر گھس کر تلاشیاں لیں۔لیکن صبح سے شام تک تلاشی کے باجود کوئی بھی ملزم پولیس کے ہاتھ نہیں لگا۔