کاروار:18/اگست (ایس اؤنیوز) کنڑا نیوز چینل کے ایک مذاکرے میں بی جے پی پارٹی کے ترجمان کی طرف سے معمارِ دستور ڈاکٹر بی آر امبیڈکر کی توہین کرتے ہوئے انہیں ملک غدار کہے جانے پر کاروار میں امبیڈکر سینا کی طرف سے متعلقہ ترجمان کے خلاف قانونی کارروائی اور حدپار کئے جانے کا مطالبہ لے کر ڈی سی کے توسط سے ریاستی وزیر اعلیٰ کو میمورنڈم سونپ کر پتلا نذرآتش کیا گیا ۔

ڈاکٹر امبیڈکر سینا کے ضلعی صدر پریم کمار کی قیادت میں دیگرعہدیداروں اور ذمہ داروں کے ساتھ سونپے گئے میمورنڈم میں کہاگیا ہے کہ 9اگست 2017کو ریاست کے کنڑا نیو ز چینل سورنا میں بھارت چھوڑو تحریک پر مذاکرہ چل رہاتھا اس میں شریک ہوئے بی جےپی کے ترجمان تیجسوی سوریا نے معمارِ دستور، قومی ہیرو ڈاکٹر بھیم راؤ امبیڈکر کے متعلق توہین آمیز الفاظ کا استعمال کرکے انہیں ملک غدار کہتے ہوئے انہیں ذلیل کیا ہے۔ جب ساری دنیا ڈاکٹر امبیڈکر کو معلومات کا خزانہ کہہ رہی ہے اور ہمارے ملک بھارت میں مظلوموں کا استحصال اور ظلم کیا جارہاہے، دراصل ملک کے مسیحا کی توہین کرنا ہی ملک غداری ہے، ڈاکٹر امبیڈکر ایک چھوت چھات والی ذات میں جنم لینے پر سنگھ پریوار والے انہیں کم نظر سے دیکھتے رہے ہیں، اس معاملے میں متعلقہ تیجسوی سوریا کے خلاف دلت ظلم قانون کے تحت قانونی کارروائی کرنے اور انہیں حدپار کرنےپر زور دیا گیا ہے۔ میمورنڈم سونپنے کے بعد کارکنان نے تیجسوی کا پتلا بھی نذر آتش کیا۔ اس موقع پر ضلعی صدر پریم کمار کے علاوہ جنرل ناظم وشوناتھ الویکر، جنرل سکریٹری سنجئے ناگیکر، معاون سکریٹری تکارام ہری کنتر، تنظیمی سکریٹری ونایک کرننگ، جوائنٹ سکریٹری موہن پٹگار، کاروار سکریٹری بال کرشنا درگیکر، یوتھ صدر راہول بھوگلے،تشا نائک، ناگرتنا بھینگے، تنوجا ہولسوار ، پرشانت، شنکر، پروین ہریجن، مہا دیو ، سچن وغیرہ موجود تھے۔