کاروار میں ہوئے ڈسٹرکٹ لیول پرتیبھا کارنجی ثقافتی مقابلے میں بھٹکل کے مزید دو طلبہ کا شاندار پرفارمینس
بھٹکل:8/ اکتوبر (ایس اؤنیوز)محکمہ تعلیمات عامہ کی جانب سے منعقدہ ضلعی سطح کے پرتیبھا کارنجی مقابلے میں مزید دو اسکولوں کے بچوں نے بہترین پرفارمینس پیش کرتے ہوئے بھٹکل اور اپنے اسکول کا نام روشن کیا ہے۔
بیلنی سرکاری اسکول سے ملی اطلاع کے مطابق اسکول کی ایک طالبہ دکشھا کھاروی نے دو دو انعامات حاصل کئے ہیں، بتایا گیا ہے کہ کونکنی بھاشہ کے تقریری مقابلے میں اس کو اول مقام اور ہندی تقریری مقابلہ میں اس کو دوم مقام حاصل ہوا ہے۔
اسی طرح مصوری کے مقابلہ میں تعلقہ کے بینگرے سرکاری لوئر پرائمری اسکول کے طالب علم کشن کمار وینکٹیش نائک نے دوم مقام حاصل کرتے ہوئے اپنے اسکول کا نام روشن کیاہے۔ دونوں طلبا کی پرتیبھا کارنجی میں بہترین کارکردگی پر اسکول ترقی بورڈ کے صدور، ممبران،صدورمدرس ، اساتذہ اور دیگر ذمہ داران نے مبارکباد پیش کی ہے۔