کاروارسول اسپتال میں اسٹاف نرس بھٹکل کے 6 بزرگو ں سے رشوت لیتے ہوئے رنگے ہاتھوں گرفتار
کاروار 18؍اپریل (ایس او نیوز) کاروار کے سرکاری ضلع اسپتال میں بھٹکل کے چھمعمر حضرات سے عمرکی سنددینے کےلئے رشوت لینے کے دوران اسٹاف نرس کی خدمات انجام دینے والے لکشمی نارائن ہیگڈے کو اینٹی کرپشن بیوریو کے افسران نے رنگے ہاتھوں گرفتار کرلیا۔ گرفتاری کی یہ واردات پیر کو پیش آئی ہے۔
اطلاع کے مطابق بھٹکل تعلقہ میں بیلور کے رہنے والے 6افراد کو عمر رسیدہ بزرگوں کی پینشن پانے کے لئے درکار تصدیق نامہ دینے کے عوض ڈسٹرکٹ اسپتال کے اسٹاف نرس ہیگڈے نے فی کس500 روپے کی رشوت مانگی تھی۔ ان معمر افراد نے جملہ ۳ ہزار روپیوں کے بجائے دو ہزار روپیوں میں معاملہ طے کیا اور بھٹکل کے سماجی کارکن کرشنا نائک کے ذریعے اینٹی کرپشن بیورو کے آفسران کو خبر کردی۔
شکایت درج کرلینے کے بعد ڈی وائی ایس پی گریدھر کی قیادت والی ٹیم نے لکشمی نارائن ہیگڈے کو رشوت لیتے ہوئے رنگے ہاتھوں گرفتار کرنے جال بچھایااور جب لکشمی کانت نے ڈی سی آفس کے پیچھے رقم پہنچانے کی ہدایت کی تو متاثرین سے 2000ہزارروپئے رشوت لیتے ہوئے ملزم لکشمی نارائن کو گرفتارکرلیا اور رقم بھی برآمد کرتے ہوئے ضبط کرلی۔
کارروائی میں اے سی بی کے راجیش پربھو، گجیندر، کرشنا ، پرساد اور علی شریک تھے۔