بی ایس این ایل کی طرف سے ضلع اُترکنڑا کے دس نئے مقامات پر وائی فائی کی سہولت
کاروار 27/اگست (ایس او نیوز) بی ایس این ایل کے جنرل منیجر جی آر روی کے مطابق ضلع شمالی کینرا کے مزید دس نئے مقامات پرجلد ہی وائی فائی کی عام سہولت فراہم کی جائے گی۔
اخباری نمائندوں سے بات چیت کرتے ہوئے مسٹر روی نے بتایا کہ کاروار کے میڈیکل کالج، رویندرا ناتھ ٹیگور بیچ، گرین اسٹریٹ کے علاوہ بھٹکل کے انجمن انجینئرنگ کالج ہاسٹل، مرڈیشور بیچ،سداپور تعلقہ کے کانگوڈ،گوکرن اوم بیچ، کوُڈلے بیچ، سرسی اے پی ایم سی اور ڈانڈیلی کے گنیش گُڑی اووڈس فاریسٹ میں یہ سہولت فراہم کی جارہی ہے۔انہوں نے کہا کہ اس اسکیم پر عمل کرنے کے لئے ضروری مشینیں اور آلات ستمبر میں موصول ہونگی۔
بی ایس این ایل لینڈ لائن والوں کو امسال ۵۱ /اگست سے نئی سہولت فراہم کی گئی ہے۔ اس کے تحت اتوا ر کے دن ۴۲ گھنٹے اور پیر سے سنیچر تک رات کے ۹ بجے سے صبح کے سات بجے تک کسی بھی مقام کے لینڈ لائن یا موبائل فون کو مفت کال کی جاسکے گی۔ البتہ اس سہولت کو پانے کے لئے ہر مہینہ 49روپے کی فیس ادا کرنی ہوگی۔پہلے چھ مہینوں تک یہ سہولت جاری رہے گی اس کے بعد اسے عام پلان میں تبدیل کیا جائے گا۔یہ سہولت پانے کے لئے کوئی اضافی چارج نہیں ہے۔
مسٹر روی نے بتایا کہ ضلع کے ۶۲۲ مقامات پر بی ایس این ایل تھری جی ٹاور تعمیر کرنے کاکام تیز رفتاری سے جاری ہے۔بی ایس این ایل میں نئی افرادی بھرتی نہ ہونے کی وجہ سے بعض جگہوں پر مرمت کے کاموں میں دشواری ہورہی ہے۔ پھر بھی گاہکوں کوبہتر خدمات فراہم کرنے کے لئے اب ٹھیکے کی بنیاد پر کام دینے کا منصوبہ بنایا جارہا ہے۔ اس کے علاوہ ضلع کے دیہی علاقوں میں ہر جگہ ٹیلی فون رابطہ فراہم کرنے کاکام پورا کیا جائے گا۔اس موقع پر بی ایس این ایل کے ڈپٹی جنرل منیجر (ایڈمنسٹریشن) وی این بھٹ، ڈپٹی جنرل منیجر (ایکزیکٹیو) نذیر شیخ، جی جی بھٹ وغیرہ موجود تھے۔