کاروار:09/ستمبر(ایس اؤنیوز)سماجی کارکن ،صحافت کی بے باک و نڈرمجاہدہ گوری لنکیش قتل کی مذمت اور ملزمان کی فوری گرفتاری کا مطالبہ لے کر روشن خیال ادیبوں ، کالم نگاروں ، دلت ، کسان ، مزدور، خواتین تنظیموں کے زیر اہتمام مشترکہ احتجاجی ریلی کا انعقاد کرتے ہوئے اے سی شیوانند کرالے کے توسط وزیر اعلیٰ کو میمورنڈم پیش کیا گیا ۔

شہر کے سبھاش سرکل پر جمع ہوئے مختلف اداروں اور تنظیموں کے ممبران نے گوری لنکیش قتل کی مذمت میں نعرے بازی کی ۔ اس کے بعد بس اسٹانڈ سے ہوتے ہوئے شہر کے اہم سڑکوں سے گزر کر ضلع ڈی سی دفتر کے پاس رک کر گوری لنکیش کے قاتلوں کو گرفتار کرنے کی مانگ کرتے ہوئے نعرے لگائے۔

اس موقع پر مختلف تنظیموں کے ذمہ داران نے خطاب کرتے ہوئے کہاکہ سماجی خدمت گار، مفکر اور ایک صحافی کے طورپر اپنی شناخت پید اکرنے والی گوری لنکیش کا قتل انسانی عقل کو دنگ کردیتاہے، بے انصافی کے خلاف آواز بلند کرنے والوں کو قتل کرتے ہوئے شخصی آزادی کو دبانے کی لگاتار کوشش ہورہی ہے۔ اس پر قد غن لگاتے ہوئے شخصی آزادی کو ترجیح دینے کا فوری کام ہو۔ شخصی آزادی دستوری حق ہے جس کی حفاظت ہونی چاہئے۔ ریلی میں یمونا گاؤنکر، پروفیسر شری دھرنایک، راما نائک، بابو شیخ، مادھو نایک، رمیش گنگی ، شیام سندر گوکرن، ماروتی باڈکر، ناگیش نائک، رمیش بھنڈاری ، جی ڈی منوج، گنیش راتھوڑ وغیرہ موجود تھے۔

شہر میں اسی طرح کی جن شکتی ویدیکے کی جانب سے موم بتی کی مشعل نوحہ ریلی نکالتے ہوئے گوری لنکیش کے ساتھ انصاف کا مطالبہ کیا گیا ۔ شہر کے متراسماج سے شروع ہوئی نوحہ ریلی شہر کے اہم راستوں سے گزرتے ہوئے بلدیہ دفتر کے پیچھے نصب شدہ مہاتما گاندھی مجسمہ کے سامنے اختتام کو پہنچی۔ نوحہ ریلی میں جن شکتی ویدیکے کے مادھو نایک، کنڑا ساہتیہ پریشد کے سابق ضلعی صدر راما نائک، جارج فرنانڈیز، ٹیکسی یونین کے صدر سنتوش باندیکر، فادر ولسن فرنانڈیز، پربھاکر مالسیکر، شیوانند میتری، سدھارتھ نایک، خیرالنساء شیخ، ودیا رامانائک، بابو امبیگا، سرکاری انجنئیرنگ کالج کے طلبا وغیرہ شریک تھے۔